भांगरभूंय | प्रतिनिधी
म्हापशेंः पिर्णां कपिल चौधरी (19) हाच्या खून प्रकरणांत कोलवाळे पुलिसांनी गुरुदत्त लवंदे (31, कांदोळी) हाका अटक केली.
चड म्हायती प्रमाण, पिर्णां सड्यार काल, शुक्रारा तरणाट्याची कूड मेळिल्ली. अॅम्बुलन्सींतल्यान कूड म्हापशेंच्या जिल्हो हॉस्पिटलांत व्हेली थंय दोतोरांनी ताका मरण आयिल्ल्याचें सांगलें.
कोलवाळे पुलिसांनी दिल्ले म्हायती प्रमाण, कपिलान 30 ऑक्टोबराक गुरुदत्त लवंदे कडल्यान जीए 03 एएच 5254 क्रमांकाची थार गाडी भाड्यान घेतिल्ली. ताणें दीपक ठाकुराच्या नांवान वळख पत्र दिल्लें. थार कार गोंयच्यान बांदा, महाराष्ट्रांत पावली अशें कार ट्रॅकराचेर दिसून आयलें. तेन्ना गुरूदत्त आपल्या इश्टांक वांगडा घेवन किया सेल्टोस गाडयेंतल्यान थार गाडयेचो फाटलाव करपाक लागलो. तांकां महाराष्ट्रांतल्या कणकवली हांगा थार मेळ्ळी. तांणी कपिलाक गाडये वांगडा थिवे हाडून ताका मारपेट केली. मागीर तांणी ताका थिवींतल्या एका पठाराचेर उडयलो. उपरांत लागसारच्या सोऱ्याच्या दुकानांतल्यान एक सोऱ्याची बाटली विकती घेवन तो सोऱ्याच्या नशेंतल्यान मेल्लो अशें कळचें म्हूण ताच्या बोल्सांत दवरलीं.
ह्या प्रकरणांत गुरूदत्त लवंदेक पयलीं ताब्यांत घेतलो आनी उपरांत ताका अटक केली. दुबावितान हेर सहकाऱ्यां वांगडा खून केल्ल्याची कबूली दिल्या. कोलवाळे पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
