भांगरभूंय | प्रतिनिधी
भांगरभूंय । प्रतिनिधी
पणजीः वट्ट दोन वर्सा उपरांत सरकाराक गोंय राज्य भुरगीं हक्क राखण आयोगाची नवी समिती वेचपाचो निमणे कडेन मुहूर्त मेळ्ळो. हे समितीचे रितीं आशिल्ले अध्यक्ष तशेंच हेर वांगडी पद भरपा खातीर बायलां आनी भुरगीं कल्याण खात्यान इत्सुकां कडल्यान आतां अर्ज मागयल्यात. हे नवी समितीचो कार्यकाळ तीन वर्सा खातीर आसतलो, अशीं कळोवणी बायल आनी भूरगीं उदरगत खात्यान दिल्या.
गोंय राज्य भुरगीं हक्क राखण आयोगाचे अध्यक्ष पिटर बोर्जिस आशिल्ले. पिटर हांचे फुडारपणा खाला नेमिल्ले समितीचो कार्यकाळ सोंपिल्ल्यान 19 मे 2024त ती बरखास्त केल्ली. फाटली दोन वर्सा हे समितीक अध्यक्ष आनी समिती नाशिल्ले कारणान हे आयोग पुराय निश्क्रीय जाल्लें. बोर्जीस हांचो कार्यकाळ सोंपले उपरांत आयोगाची नवीन समिती वेंचून काडपा खातीर सरकारां कडेन मान्यताय मागिल्ली. पूण फाटली दोन वर्सा ही प्रक्रिया सरकारा कडेन प्रलंबित उरिल्ली.
आतां नवी समिती वेंचपाक सरकारान मान्यताय दिवन, बायलां आनी भुरगीं उदरगत खात्यान भुरगीं हक्क संरक्षण आयोग कायदो, 2005 च्या कलम 17 खाला स्थापन केल्ल्या गोंय राज्य भुरगीं हक्क संरक्षण आयोगाचो अध्यक्ष आनी वांगड्यांच्या पदां खातीर पात्र व्यक्ती कडल्यान अर्ज मागयल्यात. हे समितीचो कार्यकाळ तीन वर्सांचो आसतलो.
अध्यक्ष पदां खातीर इत्सुक उमेदवार हो प्रतिश्ठीत आसचो आनी तांणी भुरग्यांच्या कल्याणा खातीर उत्कृश्ट काम करप गरेजेचें. तशेंच पदां खातीर पिराय 65 वर्सा मेरेन मर्यादीत दवरल्या.
वांगडी पदां खातीर इत्सुक उमेदवार प्रतिश्ठीत, सक्षम, प्रामाणीक, उत्कृश्ट दर्जाचो आसपाक जाय. तशेंच शिक्षण, भुरग्यांची भलायकी, जतनाय, कल्याण वा भुरगीं उदरगत, बाल न्याय वा दुर्लक्षीत, उपेक्षीत वा दिव्यांग भुरग्यांची जतनाय, बालकामगार निर्मुलन वा अडचणीत आशिल्ल्या भुरग्यां खातीर काम, बालमानसशास्त्र वा समाजशास्त्र आनी भुरग्यां कडेन संबंदीत कायदे क्षेत्रांत अणभवी आसपाक जाय. ह्या पदार खातीर इस्तुक व्यक्तींची पिराय 60 वर्सा परस अदीक आसची न्हय.
पात्र इत्सुकांनी साद्या कागदाचेर अर्ज सादर करून हो अर्ज संचालक, बायलां आनी भुरगीं संचालनालय, 2रो माळो, पोरणी शिक्षण इमारत, 18 जून रोड, पणजी गोंय हांगा 21 नोव्हेंबर 2025 मेरेन धाडचो. अपूर्ण अर्ज तशेंच गरजेचीं कागदपत्रां नाशिल्ले अर्ज खंयचेच पूर्व सुचोवणे बगर सरळ रद्द करतले, अशी सुचोवणी बायलां आनी भुरगीं उदरगत खात्याच्या संचालकान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
