भांगरभूंय | प्रतिनिधी
आंध्र प्रदेश, खबरां संस्थाः एकादशी निमतान आंध्र प्रदेशांतल्या श्रीकाकुलम शारांत कासिबुग्गा वेंकटेश्वर देवळांत खेटाखेट जाली. ह्या खेटाखेटींत णव जाणांक मरण आयलें. जाल्यार जायते जाण जखमी जाल्यात.
मेळिल्ल्या म्हायती प्रमाण, गर्देक लागून ही घडणूक घडली आसुये. जखमी जाल्ल्यांक उपचारा खातीर हॉस्पिटलांत व्हेल्यात. मरण आयिल्ल्यांचो आंकडो वाडूंक शकता. मरण आयिल्ल्या मदीं बायलांचो आंकडो चड आसा.
हे घडणुके उपरांत आंध्र प्रदेशाचे मुख्यमंत्री चंद्रबाबू नायडू हांणी दुख्ख उक्तायलें. ताणें एक्साचेर बरयल्ल्या पोस्टांत म्हणलां, “ही घडणुक खूब दुख्खद आसा. मरण आयिल्ल्यांच्या कुटुंबा विशीं दुख्ख उक्तायतां. जखमींक बेगोबेग आनी योग्य उपचार मेळचे अशी सुचोवणी संबंदीत अधिकाऱ्यांक दिल्या. थळाव्या अधिकाऱ्यांक आनी भौशीक प्रतिनिधींक थंय भेट दिवन मजत काम आनी हेर उपायांचेर देखरेख दवरपाची विनवणी केल्या.”
राज्यांतली अंदूंची तिसरी घडणूक
व्यकंटेश्वर देवळांत जाल्ली खेटाखेट ही अंदूंची तिसरी घडणूक. 30 एप्रीलाक विशाखापट्टणमांतल्या सिंहचलम देवळांत पावसाक लागून वणत कोसळून सात जाणांक मरण आयिल्लें. 8 जानेवारीक आंध्र प्रदेशांतल्या तिरुपतींतल्या तिरुमाला हांगाच्या लॉर्ड वेंकटेश्वर देवळाच्या खाशेल्या दर्शना खातीर तिकेट वांटपा खातीर काउंटराचेर खेटाखेट जावन स जाणांक मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
