भांगरभूंय | प्रतिनिधी
नवी दिल्ली, खबरां संस्था ः केंद्रीय गृहमंत्री दक्षता पदक 2025 खातीर गृह मंत्रालयान देशांतल्या 1,466 सुरक्षा कर्मचाऱ्यांची निवड केल्या. गृह मंत्रालयान शुक्रारा हाची घोशणा केल्या.
हीं पदकां ऑपरेशन्स, इन्व्हेस्टिगेशन्स, इंटेलिजेंस आनी फॉरेन्सिक सायन्स अशा चार मळां वयल्या कर्मचाऱ्यांक तांणी केल्ल्या उत्कृश्ट कामगिरी, वेवसायीकपण आनी सहकाऱ्यांक प्रेरणा दिल्ल्या खातीर दितले.
हातूंत मे-जुलयांत जाल्ल्या आतंकवादी विरोधी कारवाय “ऑपरेशन महादेव”त वांटो घेवपी 20 जम्मू-काश्मीर पुलीस कर्मचाऱ्यांचो आस्पाव आसा. जातूंत पहलगाम हल्ल्याचो मास्टरमायंड आतंकवादी सुलेमान उर्फ आसिफ हाका मरण आयिल्लें. ह्या कारवायेंत मरण आयिल्ले तीन पाकिस्तानी आतंकवादी जिब्रान (ऑक्टोबर 2024त सोनामार्ग बोगद्याचेर जाल्ल्या हल्ल्यांतय वांटो घेतिल्लो) आनी हमजा अफगानी आशिल्लें.
केंद्रीय गृहमंत्री दक्षता पदकां 1 फेब्रुवारी 2024 दिसा सुरू जाल्लीं. ती देशभरांतल्या पुलीस दळ, सुरक्षा एजन्सी, गुप्तचर एजन्सी, राज्यां आनी संघराज्य प्रदेशांचे खाशेले फांटे, केंद्रीय सशस्त्र पुलीस दळ, केंद्रीय पुलीस संघटना आनी न्यायालयीन विज्ञान खात्याच्या कर्मचाऱ्यांक दितात. दर वर्सा सरदार वल्लभभाई पटेल हांच्या जयंती दिसा 31 ऑक्टोबराक ही पदकां जाहीर करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
