भांगरभूंय | प्रतिनिधी
फाल्यां सावन ऑनलायन अर्ज स्विकारपाक जातली सुरवात
भांगरभूंय । प्रतिनिधी
पणजी : पयली ते आठवी मेरेनच्या शिक्षकां खातीर आतां सक्तीची आशिल्ली शिक्षक पात्रताय चांचणी 9 आनी 10 डिसेंबराक जातली. गोंय शालांत मंडळा वतीन ही परिक्षा जातली. परिक्षे खातीरचे ऑनलायन अर्ज 1 नोव्हेंबर ते 15 नोव्हेंबर मेरेन सादर करप गरजेचें आसा.
परिक्षेचो अभ्यासक्रम, शुल्क तशेंच हेर नेम आशिल्ली पुस्तिका शालांत मंडळान जारी केल्या. पयली ते आठवी मेरेनच्या शिक्षकांच्या पदां खातीर जीटीईटी परिक्षा पास जावप गरजेचें आसा. ही परिक्षा पास जावंक नाशिल्ले उमेदवार शिक्षक पदा खातीर पात्र थारचे नात. हाका लागून हे परिक्षेक म्हत्व आयलां. परिक्षे खातीर दोन पेपर आसतले. पयली ते पांचवी मेरेनच्या शिक्षकां खातीर पयलो पेपर दिवचो पडटलो. सवी ते आठवी मेरेनच्या शिक्षकां खातीर दुसरो पेपर दिवचो पडटलो. दोनूय पेपरांची परिक्षा दिवपाची मेकळीक आसा. शुल्क मात वेगवेगळें भरचें पडटलें. शिक्षण हक्क कायदो (आरटीई) लागू जाल्ले उपरांत भरती जाल्या शिक्षकां खातीर ही परिक्षा पास जावप गरजेचें थारता. हाका लागून सेवेंत आशिल्ले शिक्षक लेगीत हे परिक्षेक बसतले, अशी म्हायती गोपांनी दिली. उत्तर गोंयांत सेंट झेवियर उच्च माध्यमीक विद्यालय, म्हापशें आनी दक्षीण गोंयांत रोजरी उच्च माध्यमीक विद्यालय, नावेली हांगा परिक्षा जातली. दोनूय पेपर दरेकी 150 गुणांचे आसतले. पास जावपाक 60 टक्के म्हणल्यार 90 गूण मेळप गरजेचें आसा. एससी, एसटी आनी ओबीसीं खातीर पास जावपाक 55 टक्के म्हणल्यार 83 गूण मेळप गरजेचें आसा. एका पेपरा खातीर 1800 रुपया जाल्यार दोनूय पेपरां खातीर 3 हजार रूपया शुल्क भरचें पडटलें. एससी, एसटीं खातीर एका पेपराक 900 जाल्यार दोनूय पेपरांक 1500 रुपया शुल्क फारीक करचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
