ओला ई विकपाक तात्पुरती बंदी

भांगरभूंय | प्रतिनिधी

येरादारी खात्याची कारवाय : गाडी धनयांनी केली कागाळ

भांगरभूंय । प्रतिनिधी

पणजी : येरादारी खात्यान ओला इलेक्ट्रीक गाडयांची कंपनीचें ट्रेड सर्टिफिकेट (टीसी) आनी ऑनलायन नोंदणी तात्पुरती स्थगीत केल्या. स्थगिती आसा मेरेन कंपनीक गोंयांत नव्या गाडयांची विक्री करपाक मेळची ना. गिरायकांच्यो सगल्यो समस्या सुटाव्यो जाले उपरांत स्थगिती काडटले, अशें खात्यांतल्या वरिश्ठ अधिकाऱ्यांनी सांगलें. शुक्रारा गोंयभरांतल्या ओला गाडयांची धनयांनी खात्यांतल्या वरिश्ठ अधिकाऱ्यांची भेट घेवन हे विशीं कागाळ दाखल केली.

येरादारी अधिकाऱ्यांनी सांगलें, येरादारी खातें तशेंच गिरायक कागाळ निवारण आयोगा कडेन ओला इलेक्ट्रीक गाडयांचे विक्री उपरांत पेड्डेर सेवे संबंदांत गोंयभरांतल्यान कागाळी आयल्यात. आयोग तांच्या नेमा प्रमाण ह्यो कागाळी हाताळटले. येरादारी खात्या वतीन कंपनीक दितात तें ट्रेड सर्टिफिकेट दिवप बंद केलां. कंपनी डिलराक आरटीओ कडल्यान टीसी मेळूंक नाशिल्ल्यान नव्यो गाडयो रस्त्याचेर हाडपाक मेळच्यो ना. तशेंच कंपनीची नोंदणी प्रक्रिया लेगीत ऑनलायन पद्दतीन ब्लॉक केल्या.

ते आदीं ओला गाडी धनयांनी माध्यमां कडेन संवाद सादलो. धर्मा नायक हांणी सांगलें, ओला कंपनीची विक्री केले उपरांत सेवा सामकी पेड्डेर जाल्या. कंपनी कडेन सगल्यो सुविधा आशिल्लें सर्विसींग सेंटर ना, दुरुस्ती खातीर तंत्रज्ञ नात, गाडयांचे स्पेअर पार्ट लेगीत वेळार मेळनात. गाडी नादुरुस्त जाली जाल्यार उण्यांत उणे आठ म्हयने ती परतून मेळना. कंपनीच्या वेर्णेंच्या सर्विंसींग सेंटरांत उण्यांत उण्यो 800 ते हजारभर गाडयो पडून आसात. हे संबंदांत आमी मुख्यमंत्री कार्यालया कडेन हस्तक्षेप केले उपरांतूच कंपनीन नवे तंत्रज्ञ आपयल्यात. अजीत परब हांणी सांगलें, केंद्र तशेंच गोंय सरकार इलेक्ट्रीक गाडयांचे खरेदी खातीर उर्बा दिता. सरकारा कडल्यान अनुदान लेगीत दितात. इलेक्ट्रीक गाडी घेतले उपरांत ताचे विक्री परांत सेवा बरी मेळना. गोंयांत ओला कंपनीचे पांच ते स शोरूम आसात. गोंयांत साबार वाठारांनी सर्वीस सेंटरां आशिल्लीं. मात फाटल्या दोन- तीन म्हयन्यां सावन ती बंद करून वेर्ण्या एकूच सर्वीस सेंटर सुरू दवरला. मात थंय योग्य सेवा मेळना. सध्या वॉरंटींत आशिल्ल्यो गाडयो लेगीत थंय पडून आसात.