भांगरभूंय | प्रतिनिधी
पणजी : अरबी दर्यांतल्या उण्या दाबाचो पट्टो तशेंच पूर्व दर्यादेगांचेर पाविल्ल्या मोंथा चक्रीवादळाक लागून अंदूं ऑक्टोबर म्हयन्यांत पावसान बरोच नेट धरलो. राज्यांत १ ते ३१ ऑक्टोबर मजगतीं सरासरी १४.७८ इंच पाऊस पडलो. हाका लागून अंदूंच्या ऑक्टोबरांत फाटल्या ९७ वर्सांतल्या ऑक्टोबर म्हयन्यांतल्या पांचव्या सगल्यांत चड पावसाची नोंद जाली. ह्यान पयलीं ऑक्टोबर २०१९ वर्सा सगल्यांत चड २१.५२ इंच पावसाची नोंद जाली.
शुक्रारा राज्यांत वत-पावसाचो खेळ सुरू आशिल्लो. अदीं मदीं मध्यम स्वरूपाच्या पावसाची सरींची नोंद जाली. हवामान खात्यान १ ते ६ नोव्हेंबर मजगतीं पावस शिरशिरपाची शक्यताय उक्तायली. ह्या स दिसां खातीर पावसाचो कसलोच अलर्ट दिवंक ना. राज्यांत चोवीस वरांनी सरासरी ११.६ मिलिमीटर पावसाची नोंद जाली. शुक्रारा पणजे चडांत चड ३२.२ अंश सेल्सिअस तापमानाची नोंद जाली.
राज्यात १ ते ३१ ऑक्टोबर मजगतीं मुरगांवां सगल्यांत चड १९.६० इंच पावसाची नोंद जाली. पेडण्यां १९.५९ इंच, धारबांदोड्यां १८.३१ इंच, पणजे १८.०६ इंच, काणकोणा १७.३२ इंच, पोरणें गोंयां १५.६५ इंच, दाबोळे १४.४० इंच, म्हापश्यां १४.३७ इंच, सांखळे १३.२५ इंच, मडगांवां १०.४५ इंच, केपें ९.८५ इंच, फोंडें ९.४१ इंच जाल्यार सांग्यांर ९.१५ इंच पावसाची नोंद जाली.
स म्हयन्यांत १६४ इंच पावसाची नोंद
राज्यात १ मे ते ३१ ऑक्टोबर मजगतीं १६३.९८ इंच पावसाची नोंद जाली. मे म्हयन्यांत २५.७७ इंच, जुनांत ३१.३४ इंच, जुलयांत ४६.६९ इंच, ऑगस्टांत ३५.२२ इंच, सप्टेंबरांत १०.१७ इंच, ऑक्टोबरांत १४.७८ इंच पावसाची नोंद जाली.
ऑक्टोबर म्हयन्यांत सगल्यांत चड पावस
वर्स – पावस (इंचात)
२०१९ – २१.५२
२००६ – १६.६८
१९५५ – १६.२६
१९८५ – १५.५२
२०२५ – १४.७८
२००९ – १३.८५
१९३१ – १३.५४
१९२८ – १३.०९
२०१० – १२.८१
२०२४ – ११.८१
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
