भांगरभूंय | प्रतिनिधी
जेमिमा रॉड्रिग्स आनी हरमनप्रीत कौर हांचे जबरदस्त भागिदारीच्या नेटार भारतान बायलांचे संवसारीक वन डे क्रिकेट सर्तीचे फायनलींत सुवात मेळयली. हांगाच्या डी व्हाय पाटील स्टेडियमाचेर जाल्ले दुसरे सेमी फायनलींत ताणें बळिश्ट ऑस्ट्रेलिया पंगडाक 5 विकेटींनी हारायलो.
ऑस्ट्रेलिया पंगडान दिल्ली 339 धांवड्यांची मोख भारतान 48.3 ओव्हरींनी 5 विकेटी व्हगडावन मेळयली. जेमिमान नाबाद 127 धांवड्यांची खेळी केली. भारताक फायनलींत सुवात मेळोवन दिवपाक तिचो मोलादीक वांटो आशिल्लो. तिचे खेरीत मुखेली हरमनप्रीत कौर हिणें 89 धांवड्यांची खेळी केली. हातूंत 10 चवक्यांचो आनी दोन सक्यांचो आस्पाव आशिल्लो.
भारत आतां 2 नोव्हेंबराक जावपी फायनलींत दक्षीण आफ्रिका पंगडा आड खेळटलो.
ते टॉस जिखून पयलीं बॅटींग करपाचो निर्णय घेवपी ऑस्ट्रेलिया पंगडान फोएब लिचफिल्डाचो शेंकडो, जाल्यार एलिसा पेरी आनी अॅश्ले गार्डनर हांच्या अर्द शेंकड्यांच्या नेटार 49.5 ओव्हरींनी 338 धांवड्यां मेरेन मजल मारली.
लिचफिल्ड आनी एलिसा हांणी दुसरे विकेटी खातीर 155 धांवड्यांची म्हत्वाची भागिदारी केली. ताका लागून ऑस्ट्रेलिया पंगडाक व्हड धांवसंख्ये कडेन वाटचाल करप शक्य जालें.
लिचफिल्ड (119) आनी एलिसा (77) खेळपट्टीचेर आशिल्ल्यो ते मेरेन ऑस्ट्रेलिया 350चो टप्पो सहज हुपतलो अशें दिशिल्लें. पूण, भारताच्या बॉलरांनी म्हत्वाच्या वेळार विकेटी घेवन ऑस्ट्रेलियाच्या धांवगतीचेर नियंत्रण दवरलें.
भारता खातीर धोक्याची थारपी चिलफिल्ड आनी एलिसाची भागिदारी अमनजौत कौरान फोडली. लिचफिल्ड 122 बॉलांनी 119 धांवड्यो करून बाद जाली आनी ऑस्ट्रेलियाचे धांवगतीक ब्रेक लागलो. चिलफिल्ड बाद जाल्या उपरांत एलिसान डावाचीं सुत्रां आपल्या हातांत घेतलीं. पूण, श्री चरणी हिणें ऑस्ट्रेलिया पंगडाक एका फाटल्यान एक अशे दोन धपके दिले. तिणें बेथ मुनी (24) आनी अॅनाबेल सदरलॅण्ड (3) हांकां तंबूंत धाडलीं. ते उपरांत राधा यादवान पेरीची उत्कृश्ट खेळी सोंपयली. 77 धांवड्यांचेर खेळपी पेरीक तिणें बोल्ड केली.
ताहिला मॅक्ग्रा हिका विशेश कामगिरी करपाक जमली ना. ती फकत 12 धांवड्यो करून धांवबाद जाली. पूण, अखेरेक एश्ले गार्डनरान आक्रमक बॅटींग करून ऑस्ट्रेलियाचो डाव 300च्या मुखार व्हेलो. गार्डनर 63 धांवड्यांचेर बाद जाली.
ते उपरांत दिप्ती शर्मान डावाचे अखेरेचे ओव्हरींत अलाना किंग (4) आनी सोफी मोलिन्युक्स हांकां खातें उगडचे पयलींच तंबूंत धाडलीं. दिप्तीक हॅट्रीक पूर्ण करपाक मेळूंक ना पूण, किम गार्थ (17) धांवबाद जाल्ल्यान ऑस्ट्रेलिया पंगडाक पुराय 50 ओव्हरी खेळपाक जमूंक ना.
श्री चरणी आनी दिप्ती शर्मा हांकां दरेकी दोन विकेटी फावो जाल्यो. अमनजौत कौर, क्रांती गौड आनी राधा यादव हांकां एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
