भांगरभूंय | प्रतिनिधी
मुरगाव पालिकेच्या मालकीच्या कांय इमारतींचाेय आस्पाववास्कोः मुरगांव नगरपालिका वाठारांतल्यो सुमार 40 इमारती जर्जर जाल्ल्यान धोक्याच्यो जाल्यात. हातूंत मुरगांव नगरपालिकेच्या मालकीच्या कांय इमारतींचो आस्पाव जाता. उल्लेख केल्ल्यो इमारती मोडपा खातीर इमारतींच्या धनयांनी फावो ती पावलां उबारपाची गरज आसा. पूण मुरगांव नगरपालिका धाडिल्ल्या सुचोवण्यांक कसलीच जाप दिना. देखून मुरगांव नगरपालिका आनी सरकार हांगा फुडली कारवाय करपाची गरज आसा अशी प्रतिक्रिया उक्तायतात.
हांगाच्या कांय इमारतींच्या सकयल पांयफुटा वयल्यान लोक वतात. उल्लेख केल्ल्यो इमारती रस्त्याक लागीं आशिल्ल्यान त्या इमारतीं संबंदी सदांच हुस्को उक्तायतात. त्याे इमारती मोडपा खातीर मुरगांव नगरपालिका दर वर्सा नोटीस जारी काडटा. तशेंच भितरल्या रस्त्यार आशिल्ल्या हॅपी अपार्टमेंटाची दोन बाल्कनी ऑगस्टांत रस्त्यार कोसळ्ळी. सुदैवान त्या वेळार रस्त्यार वाहनां वा लोकांची यो-वच नाशिल्ल्यान व्हडली आपत्ती टळ्ळी.
ही इमारत जर्जर आनी धोक्याची जाल्ल्यान त्या इमारतीच्या फ्लॅटांनी कोणूच रावना. पूण तळमजल्यार दोन दुकानदार आपलो वेवसाय करताले. पूण बाल्कनी कोसळ्ळ्या उपरांत तांकां दुकानां बंद करचीं पडलीं. हाका लागून तांच्या उदरनिर्वाहाचेर प्रस्नचिन्न उबें जालें. बाल्कनी कोसळ्ळ्या उपरांत थंयच्या अर्द्या परस चड रस्त्याचेर आडखळी घाल्यो. त्या इमारती सकयल कोणूच वचूंक शकना असो हेतू आसा. पूण ह्या रस्त्याचे एके वटेन गाडयो चलतात. उल्लेख केल्ल्या इमारती संबंदी केन्ना आनी कितें निर्णय घेतले असो प्रस्न उप्रासता. वास्कोचे आमदार कृष्ण सळकार हांणी हांगाची दुर्दशा आनी जर्जर इमारती हांची दखल घेतल्या.
त्यो इमारती मोडून उडोवपा खातीर ताणें फालोअप करपाक सुरवात केल्या. फुडल्या दोन म्हयन्यांत योग्य कारवाय करतले अशें तांणी स्पश्ट केलें. त्या इमारतींची स्थिती मतींत घेतल्यार लोकांच्या जिविताचो आमकां हुस्को आसा. सुमार 40 इमारतीं मदीं चार ते पांच इमारतींची स्थिती भिरांकूळ आसा. ते खातीर दक्षिण गोंय जिल्होधिकारी इगना क्लिट्स हांकां त्यो इमारती मोडून उडोवपाची दखल घेवची अशी विनंती आमी केल्या. ते प्रमाण ताणें पावलां उबारपाक सुरवात केल्या. तीं इमारती मोडपा खातीर संबंदीत मालकांक नोटीस धाडचीं, त्या नोटीसांक जाप मेळ्ळी ना वा संबंदीतांनी तीं इमारती मोडपाक न्हयकार दिलो जाल्यार तीं इमारती सरकारान मोडचीं. इमारती मोडपाचो खर्च संबंदीत मालकांकडल्यान वसूल करपा खातीर चर्चा सुरू आसा. धोक्याची इमारत मोडपाची गरज आसा. ते खातीर बेगीनांत बेगीन ते मोडून उडोवपाचे यत्न करतात अशी म्हायती साळकारान दिली.
हांगाच्यो जर्जर इमारती मोडून उडोवपाची गरज नगराध्यक्ष गिरीश बोरकारानय उक्तायल्या. मुरगांव नगरपालिका संबंदीतांक नोटीस धाडटा, पूण उल्लेख केल्लीं इमारती मोडपाक संबंदीत तयार नात. हाचे फाटलें कारण कळना. मुरगांव नगरपालिकेची भौशीक इमारत जर्जर अवस्थेंत आशिल्ली. ताचो शिमीट काँक्रीट पडत आशिल्लो. देखून लोकांचो जीव धोक्यांत आशिल्लो. हाची दखल घेवन मुरगांव पालिकेन ही इमारत मोडून उडयली. मुरगांव पालिकेच्यो हेर कांय इमारती जर्जर आनी धोक्याच्यो जाल्यात. ते मोडून उडोवपाची परवानगी सरकारान दिवची, जाका लागून थंय वेपारी संकुल बांदपाक मेळटले. हाका लागून येणावळ मेळोवपाक पालिकेक मजत जातली अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
