भांगरभूंय | प्रतिनिधी
मुख्यमंत्री : पर्वरे, साळगांवां येवजणेच्या अर्जांचे वांटप
पणजी : ‘म्हजें घर’ येवजणेक विरोधी आमदारांनी विधानसभेंत विरोध केलो. विरोधी आमदारांचे चिथावणेक लागून कायदो दुरूस्ती आड न्यायालयांत याचिका दाखल जाल्या, असो आरोप मुख्यमंत्री डॉ. प्रमोद सावंत हांणी केलो. पर्वरी मतदारसंघांत ‘म्हजें घर’ येवजणेचे अर्ज वाटपाचे कार्यावळींत ते उलयताले.
सरकारी, कोमुनिदाद तशेंच खाजगी जमनी वयलीं अनधिकृत घरां अधिकृत करपी येवजणेच्या अर्जांचे वांटप करपी कार्यावळी सुरू आसात. बिरेस्तारा 30 ऑक्टोबराक पर्वरी आनी साळगांव मतदारसंघांत कार्यावळी जाल्यो. घरां वाटावपा खातीर आनी झगडीं उणीं करपा खातीर सरकारान ‘म्हजें घर’ येवजण सुरू केल्या.
पर्वरे जाल्ले कार्यावळींत मुख्यमंत्री डॉ. प्रमोद सावंत, पर्यटन मंत्री रोहन खंवटे, राज्यसभा खासदार सदानंद शेट तानावडे हाजीर आशिल्ले. सरकाराक कोणाचेंच घर मोडपाचें ना. न्यायालयाच्या आदेशाक लागून उपजिल्होधिकाऱ्याक घर मोडपाच्या आदेशाची कार्यवाही करची पडटा. घर मोडटात तेन्ना सराकाराक लोक गाळी घालतात. अशें प्रकार बंद करपा खातीर सरकारान ‘म्हजें घर’ येवजण सुरू केल्या. जांणी विरोध केलो त्या विरोधकांक मात घरां नेमीत जाल्लीं नाका. लोकांक जमनीचे पयशें फारीक करचे पडटले. सरकार फुकट घरां नेमीत करून दिवचें ना. लोकांनी कोमुनिदाद समित्यां कडेन कसलोच वाद घाली नासतना पयशें फारीक करचे. पयलीं जर पयशें दिले आसत जाल्यार पसून दुसरे खेप पयशे दिवचे, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
