अर्जा सयत लुकसाण जाल्ल्या शेताचो फोटो धाडप गरजेचो

भांगरभूंय | प्रतिनिधी

भाताचे रोप आडवे जाल्ल्यान मशिनान लुवणी अशक्य

भांगरभूंय । प्रतिनिधी

पणजी : आडवेळ्या पावसाक लागून बार्देस, साश्ट सयत सगळ्या म्हालांतले भाताचे रोपे आडवे जाल्यात. लुकसाण भरपाये खातीर शेतकारांक अर्जा सयत लुकसाण जाल्ल्या शेताचो फोटो धाडप गरजेचो आसा. कणसां आयिल्ले रोप आडवे जाल्ल्यान मशिनान आतां लुवणी जावप अशक्य आसा, अशी म्हायती शेतकी संचालक संदीप फळदेसाय हांणी दिली.

दिवाळे पयली सुरू जाल्ल्या पावसान शेतांचें खूब लुकसाण केलां. 40 ते 50 टक्के भाताचे रोपे आडवे जाल्यात. शेतकार आदार निधी खाला लुकसाण भरपाय दिवपाचें मुख्यमंत्री डॉ. प्रमोद सावंत हांणी जाहीर केलां. विभागी शेतकी कार्यालयांनी अर्ज उपलब्ध आसात. शेतकारांनी अर्जा सयत लुकसाण जाल्ले फोटे धाडप गरजेचे आसा. शेतकारा सयत शेताचो फोटे सादर करपाक जाय. अर्ज सादर केल्या उपरांत विभागी अधिकारी पळोवणी करतले. विभागी अधिकाऱ्याच्या अहवाला प्रमाण लुकसाण भरपाय मेळटली, अशें शेतकी संचालक संदीप फळदेसाय हांणी सांगलें. हॅक्टरी 40 हजार प्रमाण लुकसाण भरपाय मेळटली. चडांत चड 4 हॅक्टर मेरेन लुकसाण भरपाय दिवपाची तजवीज शेतकरी आदार निधींत आसा, अशेंय तांणी स्पश्ट केलें.

पावसाक लागून शेतां आडवीं जाल्ल्यान ताची लुवणी करप आडखळीचें जालां. दोंगराळ वाठारांतली लुवणी हातान जाता. सपाट वाठारांतली लुवणी मशिनान जाता. आतां रोपे आडवे जाल्ल्यान मशिनान लुवणी करप शक्य जावचें ना. लुवणी खातीर मानाय जाय पडटले. हाका लागून परत खर्च वाडटलो. हाडिल्ल्या मशिनांचो उपेग जावचो ना, अशें शेतकी संचालकांनी सांगलें. अंदूं पयली पावसाचें प्रमाण समाधानकारक आशिल्लें. सरासरी परस भाताचे पीक चड येवपाची आस्त आशिल्ली. आतांच्या पावसान जाल्ल्या लुकसाणेक लागून भाताचें उत्पादन देवतलें.