भांगरभूंय | प्रतिनिधी
भारताच्या ब पंगडान 44वे चेस ऑलिम्पियाडांतल्या उक्त्या गटांत कांश्या पदक जिखलें. जाल्यार बायलांच्या गटांत भारताच्या अ पगडान लेगीत तिसरी सुवात मेळयतना कांश्या पदक जोडलें.
भारत ब पंगडान आपले निमाणे मॅचींत जर्मनीक 3-1 अशा फरकान हारोवन तिसरी सुवात मेळयली. उक्त्या गटांत उझ्बेकिस्तानान सगल्यांक अजापाचो धपको दीत निमाणे मॅचींत नॅदरलॅण्डाक 2.5-1.5 फरकान हारोवन भांगरा पदक जिखलें. आर्मेनियाच्या बळिश्ट पंगडाक उक्त्या गटांत दुसरी सुवात फावो जाली. निमाणे फेरयेंत ताणें स्पेनाक 2.5-1.5 अशा फरकान हारयलो.
बायलांच्या गटांत भारताक अ पंगडाक 11वे आनी निमाणे फेरयेंत अमेरिके आड 1-3 फरकान हार घेवची पडली. हे हारीक लागून ताची भांगरा पदक जिखपाची आस्त सोंपली. कोनेरु हम्पीच्या फुडारपणाखाला खेळपी भारत अ पंगड तिसरे सुवातेर उरलो.
रशिये आड झुजपी युक्रेनाच्या बायलांच्या पंगडाक भांगरा पदक फावो जालें. ताणें जॉर्जियाक फाटीं घालो. उझ्बेकिस्तानान चवथ्या बोर्डाचेर जेखोनगीर वाखिदोवाच्या जैता नेटार नॅदरलॅण्डाक हारयलो. पंगडान उत्कृश्ठ टायब्रेकराच्या स्कोरा नेटार आर्मेनियाक हारोवन भांगरा पदक जिखलें.
उझ्बेकिस्तान 11 फेरयांचे सर्तींत एकूय मॅच हारूंक ना आनी 19 गुणां सयत वस्तादपण मेळयलें.
भारत ब पंगड 18 गुणां सयत तिसरे सुवातेर आयलो. ऑलिम्पियाडांत भारताचें हें दुसरें कांश्या पदक. 2014तल्या प्रदर्शनाची ताणें पुनरावृत्ती केली. बायलांच्या गटांत कोनेरू हम्पी आनी आर वैशाली हांणी वळेरेन गुलरुखबा तोखिजोनोवा आनी इरीना क्रुश हांकां बरोबरींत आडायलीं. तानिया सचदेवाक कारिसा यिप आड जाल्यार भक्ती कुलकर्णीक तोतेव अब्राहमयान हिच्या आड हार घेवची पडली. ताका लागून भारत अ पंगडाक भांगरा पदकान हुलकावणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
