भांगरभूंय | प्रतिनिधी
याचका रावूं नाका दारांत…. म्हणपी सीतेच्या उलोवपा कडेन लक्ष दिनासतना रावणान तिका उखल्ली आनी रथांत व्हरून दवरली. तिचो राग, संताप हाका जुमानिनासतना ताचें विमान लंकेचे दिशेन व्हरपाक सुरवात केली. ते वटेन मायावी मारिच्याक मारून श्रीराम परतताना ताका फुडल्यान लक्ष्मण येतना दिश्टी पडलो. सीतेक मठयेंत एकटी सोडून लक्ष्मण आयला ते पळोवन तांच्या काळजांत चर्र जालें. ताणें लक्ष्मणाक विचारलें, ‘लक्ष्मणा, सीतेक एकटेक दवरून तूं कसो आयलो? त्या मायावी राक्षसान म्हजे भशेन आवाज काडून तुका उलो केल्लो, तो तूं खरें समजलो?’
हाचेर लक्ष्मणान म्हणलें, ‘हें हांवें सगलें देवी सीतेक सांगलें. म्हणलें, श्रीरामाक कांचय जावचें ना, ताचेर ती म्हजेर रागार जाली आनी तिणेंच म्हाका हांगां धाडलो.’ श्रीरामान म्हणलें, ‘आरे पिश्या, तिचें मात्शें रागान उलोवप तुवें इतलें मनान धरलें? बाकी सगलें सोड, पुण तिका एकटेक सोडून तुवें हांगा येवप हें सामकें चुकलें! चल आतां पयलीं आमचे मठयेंत वचूंया.
दोगूय भाव मठयेंत आयले. सगलें अस्ताव्यस्त आसलें, घडये मठयेचे चैतन्य गेलें अशें दिसतालें. श्रीराम तिका सगल्याक सोदपाक लागले, उलो मारपाक लागले.
खंय सीता तूं…
उजाड आश्रम उरला रानांनी, खंय सीता तूं जनक नंदिनी ।। धृ ।।
सांग कदंबा पळोवन सत्वर, पळय दिसता काय न्हंयेच्या तिराचेर।
हातान कमंडलु, कळसो हांडयेर, चलता दिसता काय मंदगामिनी ॥ 1॥
सांग अशोका शोक नाशका, दिसता तुका ती भू कन्यका।
कांपता कित्याक तुजीं पानां शाखा, अशुभ आयलां कितें तुज्या सपनांत ॥ 2॥
चंदना सांग सीता खंय ती कुंदलते सांग खंय ती सुदंती।
सांग आला खय ती विनयवती, कांपता कियाक वाऱ्या बगर तुमी ॥ 3॥
घातकी वेळ आयली काय परती, सीते मैथिली यो तूं परती।
आयकली ना म्हजी हांक तुवें ती, चल विसावया शीला आसनी ॥ 4॥
पळय लक्ष्मणा दिसता दोळे, म्हजेच प्रियेचे विशाल भोळे।
हरणांपोर हें तिचें माणकुलें, पाणी कित्याक ताच्या दिसता दोळ्यांनी ॥ 5॥
वारो मोनो, मोने पक्षी, कोणे व्हेली रे म्हजी कमलाक्षी।
राक्षस आयलो काय नरभक्षी, शत जल्माचें वैर अजुनी? ॥ 6॥
परतें देव तें विजयी एकदा, घाताचेर आघात आपदा।
निष्प्रभ जाली शौर्य संपदा, वच भावा नगराक तुं झणी ॥ 7॥
आतां कितें भोगपाचे उरलें? चार दिसाचें चरित्र सोंपलें।
दुख्खाचे हे सागर भरले राम वच्चो व्हांवून लाटांनी ॥ 8॥
– उदयबुवा फडके (राष्ट्रीय कीर्तनकार)
97642 43377
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
