भांगरभूंय | प्रतिनिधी
कृष्णायण
(मथुरेंत कृष्ण आनी बलराम हांचे नदरे खाला जरासंधा आड झूज करचे खातीर सैन्याचे पंगड उबे रावूंक लागले. ह्या सैन्याचो लोक नारायणी सेना म्हणून उल्लेख करपाक लागले…. आतां मुखार..)
वृंदावनांतले तरणाटे बरे तयार जातकच कृष्ण परत मथुरेंत गेलो, ते वटेन मगधातलो जरासंध कृष्ण मथुरेंत ना हे खातीर ओगी बशिल्लो. कृष्ण मथुरेंत परत आयला हें कळटकच जरासंधान आपल्या सैन्याक कृष्णाक जिवो धरपाक मथुरेंत धाडलें. पयले दोन फावटी जरासंधाच्या आनी मथुरेच्या सैन्या भितर झूज जावंक नाशिल्लें. पूण हे फावटीं तें जालें. दोशीय वटेंतले कितलेशेच सैनीक झुजांत आपले जीव व्हगडावन बसले. झूज चालू आसतना कृष्णान आपलो रथ अचकीत झूज चलतालें ते सुवाते वयल्यान भायर काडलो आनी वृंदावनाचे दिकेन आमुडलो. झूज करचे सोडून कृष्ण पळूंक लागला हें जरासंधाच्या सैन्याच्या मुखेल्यांच्या लक्षांत आयलें. तशें ताणें आपलें अर्दें सैन्य कृष्णा फाटल्यान धाडलें. रथ चलोवपांत कृष्ण खूब कुशळ आशिल्लो. जरासंधाचे सैन्य वृंदावनांत पावचे पयलीं कृष्ण पावलो. वेळ व्हगडायनासतना ताणें नारायणी सेनेच्या वृंदावनांतल्या पंगडातल्या तरणाट्यांक एकठांय करुन फाटलाव करतल्या जरासंधाच्या सैन्यार घुरी घाली. अशें कितें जायत हें जरासंधाच्या सैन्यान चितुंकूच नाशिल्ले. तें सैन्य गडबडलें. ताचो फायदो घेवन वृंदावनांतल्या तरणाट्यांनी जरासंधाचे चडशे सैन्य कापून काडलें. जांचे जीव वाटावले ते परत मथुरेक पळत सुटलें. कृष्णाचें सैन्यूय तांचो फाटलाव करीत मथुरेंत आयलें.
अर्दे सैन्य कृष्णाक धरपाक वृंदावनाचे दिकेन गेल्या उपरांत, जरासंधाच्या उरिल्ल्या अर्द्या सैन्याची बलरामाचे नारायणी सेनेन वाट लायिल्ली. इतल्यांत कृष्ण आपलो पंगड घेवन वृंदावनांतल्यान आयलो. फुडें कितें जातलें हाची कल्पना जरासंधाच्या सैन्याच्या मुखेल्यांक आयली. तो मागीर आनीक झूज करपाक रावलो ना. आपले उरिल्लें सैन्य घेवन ताणें मगधाची वाट धरली. अशें तरेन कृष्ण- बलरामाचे नारायणी सेनेन बळिश्ट जरासंधान्या सैन्याक बुद्द शिकयली. झुजा उपरांत, सगल्यो गजाली जाग्यार पडटकच वृंदावनांतले यादव कृष्णाचो निरोप घेवन परत आपल्या घरां गेले.
जरासंधाचें सैन्य झुजांत हारलें खरें. पूण कृष्णाचे नारायणी सेनेचे खूबशे सैनीक ह्या झुजांत आपले जीव व्हगडावन बशिल्लें. कृष्णाक आपल्या सैन्याची घडी परत वेवस्थीत बसोवची पडली. नवीन तरणाट्यांक प्रशिक्षण दिवन कृष्णान नारायणी सेनेचे बळ आनीकूय वाडयलें. एद्या व्हडल्या बळिश्ट जरासंधाचें सैन्य मथुरें सारख्या ल्हानशा राज्याच्या सैन्या कडल्यान हारिल्लें तेन्ना जरासंध आनीक मथुरेचेर घुरी घालचो ना अशें कृष्णाक दिशिल्लें. पूण तशें जावंक ना. कृष्णा कडल्यान हार मेळिल्ल्यान जरासंधाक लज जाल्ली. तेच तिडकीन कांय काळा उपरांत जरासंधान पयले परस व्हडलें सैन्य मथुरेचेर घुरी घालपाक धाडलें. हे फावट लेगीत कृष्ण आदले फावट केल्ले प्रमाण वृंदावनाचे दिकेन पळ्ळो. जरासंधाचे सैन्य ताका धरपाक ताचे फाटल्यान लागलें. तशें बलरामाच्या सैन्यान तांचो फाटलाव केलो. वृंदावनांत पावतकच कृष्णाचे नारायणी सेनेन जरासंधाच्या सैन्यार हल्लो केलो. एके वटेन कृष्णाचे सैन्य आनी दुसरे वटेन बलरामाचे सैन्य हे भशेन जरासंधाचे सैन्य कातरीन सांपडलें. मागीर जावंक जाय तें जालें. जरासंधाचे सैन्य मार खावन मगधांत गेलें.
जरासंधान घाल्ले हे घुरयेन नारायणी सेनेचे खूब सैनीक मेले. परत एकदा जरासंधाक लज जाली. तेन्ना तो परत एकदा आपणांक धरपाक सैन्य धाडटलो हाची आतां कृष्णाक खात्री आशिल्ली. जरासंधाचें सैन्य परत परत घुरयो घालीत जाल्यार मथुरेच्या लोकांक त्रास जायत रावतले. तेन्ना हाचेर कितें तरी कायमचो उपाय काडूंक जाय अशें कृष्णाच्या मनांत आयलें. विचार करून करून ताका एक उपाय सुचलो. तो ते विशीं बलरामा कडेन उलयलो आनी तो उपाय अंमलांत हाडपाचो अशें थारायलें. यादवांनी मथुरा सोडून पयस, जे सुवातेर जरासंध सोंपेपणी पावचो ना अशें सुवातेर वचून रावप हो आशिल्लो तो उपाय.
पयशिल्ल्या सुवातींचो विचार करपाक लागतकच कृष्णाक शंखोदर जुंव्याची याद जाली. त्या जुव्यार पावता म्हणसर तांकां कितले कश्ट जाल्ले ते कृष्णाक आनी बलरामाक खबर आशिल्ले. थंयच्या वाठारांत कितल्योशोच ल्हान-व्हडल्यो न्हंयो आशिल्ल्यो. शेतकाम करपाक जाय तितली सुपीक जमीन आशिल्ली. गोरवांक चरपाक व्हडली कुरणांय आशिल्लीं. गच्च रान आशिल्लें. ल्हान- व्हड दोंगर आशिल्लें. शंखोदर जुंव्याच्या लागसाराक परदेशांतली तारवां म्हाल घेवन येताली. तेन्ना यादवांक भायल्या देशांतल्या लोकां वांगडा वेपार करपाक संद आशिल्ली. हो सगळो विचार करुन कृष्ण- बलरामान त्या जुंव्यार यादवांक व्हरपाचें थारायलें. मथुरा सोडून तांचे वांगडा येवपी यादवां खातीर सगळ्यांत पयलीं तांकां रावपाक घरां बांदप, तांच्या गोरवांक गोठे उबे करप आनी हें जाले उपरांत मथुरा सोडून वचप अशी तांणी येवजण केली.
मुखार चलता
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
