भांगरभूंय | प्रतिनिधी
पणजी : सात म्हयन्यां फाटीं दोनापावल एका बंगल्याचेर घाल्ल्या दरोडो प्रकरणांत पणजी पुलिसांनी एकल्याक अटक केल्या. याकूब महम्मद अली (४६, उत्तरप्रदेश ) अशें ताचें नांव.
२० एप्रिलाक दोनापावलाच्या धेंपो व्हिस्ता ह्या बंगल्यार दरोडो घाल्लो. पुलिसांक हे विशीं तांत्रीक तपासणी करतना कांय पुरावे हाताक लागले. ताच्या आदारा पुलिसांनी वळख पटोवन याकूब अली हाका अटक केली. ताणें बंगलो दाखोवपाक आनी दरोडो घालपाक मजत केल्ल्याचें तपासांत उक्तें जालें.
दरोडा घातले उपरांत ह्या प्रकरणांत गुंथिल्ल्यांक आलाशिरो दिल्ल्याचेंय मुखार आयलें. अटक केल्ल्या याकूब हाची फाटभूंय गुन्यांवकारी स्वरुपाची आसा. वास्को पुलीस ठाण्याच्या हद्दीत खुनी हल्लो करप आनी शस्त्रात्र कायद्या प्रकरणांत ताका अटक केल्ली.
उपरांत कोलवाळ बंदखणींत आशिल्लो. २९ ऑक्टोबराक ताका अटक केल्ली. सध्या, ५ दिसांची पुलीस बंदखण आयकयल्या. पणजी पुलीस आनी गुन्यांव फांट्याचे मजतीन ताका अटक केल्ल्याची म्हायती पुलिसांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
