भांगरभूंय | प्रतिनिधी
म्हापशें : बार्देस म्हालांत पावसाक लागून सुमार ७० टक्के भात पिकाचें लुकसाण जालां. जे कापणी खातीर तयार आशिल्लें. ६० परस चड शेतकारांनी विभागीय कृषी कार्यालया कडेन लुकसाणेचो दावो करपी अर्ज सादर केल्यात.
पावसाक लागून परिणाम जालल्या विवीध वाठारांतल्या भात, शेतांची पळोवणी करतात. बार्देसांत ह्या अचकीत आयिल्ल्या पावसा पयलींय कापणीची प्रक्रिया सुरू आशिल्ली, लागीं-लागीं ३०-३५ टक्के कापणी पुराय जाल्ली. मात अचकीत पावस सुरू जाल्ल्यान कापणेचें काम आडोवचें पडलें. कारण शेत उदका पोंदा गेलें आनी कापणीचीं यंत्रां शेतांत व्हरप शक्य नाशिल्लें.
ह्या म्हालांत हळदोणें, उसकय, कांदोळे, शिवोले, कामुर्ली, हणजूण, थिवी, रेवोडा, मयडें, नास्नोळा, साळगांव, सांगोल्डा आतां मेरेन सुमार ६० अर्ज मेळ्ळ्यात. कर्मचारी सध्या पावसाचो परिणाम जाल्ल्या शेतांची पळोवणी करतात. अहवाला उपरांत लुकसाण जाल्ल्या शेतकारांक मजत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
