भांगरभूंय | प्रतिनिधी
बायलांचे संवसारीक वन डे क्रिकेट सर्तींत ऑस्ट्रेलिया पंगडान एकूय मॅच व्हगडायनासतना गुणतकट्यांतली पयली सुवात मेळयली, जाल्यार भारतान घरच्या प्रेक्षकांच्या तेंक्या नेटार न्युझिलॅण्डा आड म्हत्वाचें जैत जोडून सेमी फायनलींतली सुवात निश्चीत केली.
सात खेपे संवसारीक वस्तादपण जोडपी ऑस्ट्रेलिया पंगडान पावसाक रद्द जाल्ली मॅच सोडली जाल्यार सांखळी फेरयेंतल्यो सगल्यो मॅची जिखल्यात. ऑस्ट्रेलियेचो सध्याचो फॉर्म पळयलो जाल्यार ताका आठवो किताब जिखपा पसून खूब कमी पंगडांकूच आडावप शक्य आसा अशें दिसता.
सांखळी फेरयेंत ऑस्ट्रेलिया पंगडांक कांय मॅचींनी संकश्टांत तोंड दिवचें पडिल्लें. हातूंत पाकिस्ताना आडचे मॅचीचो आस्पाव आसा. एका वेळार तांची स्थिती 7 बाद 76 अशी जाल्ली. पूण, ते उपरांत ऑस्ट्रेलियेन उत्कृश्ट प्रदर्शन करून 107 धांवड्यांनी सोंपें जैत जोडिल्लें.
भारतान तांकां 330 धांवड्यांचें कठीण आव्हान दिल्लें. पूण, तें लेगीत तांणी एक ओव्हर बाकी दवरून मेळयिल्लें.
ऑस्ट्रेलियेची मुखेली एलिसा हिलीन चार डावांनी दोन शेंकड्यां सयत 294 धांवड्यो केल्यात. दुखापतीक लागून तिका फाटल्यो दोन मॅची चुकिल्ल्यो. पूण, सेमी फायनलींत खेळपाक ती सज्ज आसा. दक्षीण आफ्रिके आडचे मॅचींत तांची बॉलर किंग हिणें उत्कृश्ट प्रदर्शन केल्लें. तिणें सात धांवड्यांनी 7 विकेटी घेतिल्ल्यो.
दुसरे वटेन भारताची सांखळी फेरयेंतली कामगिरी सोंपी नाशिल्ली. सेमी फायनलींतली सुवात निश्चीत करचे पयलीं ताका सेगीत तीन मॅचींनी हार घेवची पडिल्ली.
स्टार बॅटर स्मृती मंधाना ही सर्तींत सगल्यांत चड धांवड्यो केल्यात. तिणें सात डावांनी एका शेंकड्या सयत 365 धांवड्यो केल्यात. दुसरी ओपनर प्रतिका रावल जखमी जाल्ल्यान भारताक खर धपको बसला. तिचे सुवातेर शेफाली वर्माची निवड केल्या.
भारतान 2005 आनी 2017त उप वस्तादपणाचेर समाधान मानलां. 2017 सेमी फायनलींत भारतान बळिश्ट ऑस्ट्रेलिया पंगडाक हारोवन सगल्यांक अजापाचो धपको दिल्लो. पूण, फायनलींत ताका इंग्लंडा कडल्यान हार घेवची पडिल्ली. ते हारी उपरांत ऑस्ट्रेलिया पंगडान संवसारीक वन डे क्रिकेट सर्तींत सेगीत 15 मॅची जिखून आपलो शेक कायम दवरला.
भारत आनी ऑस्ट्रेलिया ह्या पंगडां मदीं अजून मेरेन 60 मॅची जाल्यात. हातूंतल्यो 49 मॅची ऑस्ट्रेलियेन जिखल्यात, जाल्यार भारताक 11 मॅचींनी जैत जोडप शक्य जालां.
पावसाची शक्यताय
आयचे मॅची खातीर पावस पडपाची शक्यताय आसा. पावसाक लागून मॅच रद्द करची पडली, जाल्यार शुक्रार, 31 ऑक्टोबर राखीव दीस दवरला. पूण, त्या दिसाय पावस पडून मॅच रद्द करची पडली, जाल्यार भारताचें आव्हान मॅच खेळनासतना सोंपुये.
आयसीसीच्या नेमा प्रमाण सांखळी पांवड्यार सगल्यांत चड मॅची जिखपी आनी गुणतकट्यांत वयले सुवातेर आशिल्लो पंगड फुडले फेरये खातीर पात्र थारतलो.
ह्या निकशा प्रमाण भारताचो पंगड ऑस्ट्रेलिये परस खूब फाटीं आसा. भारत तीन हारी सयत सात गुणां सयत चवथे सुवातेर आसा. जाल्यार ऑस्ट्रेलिया सातांतल्यो स मॅची जिखून 13 गुणां सयत पयले सुवातेर आसा. एक मॅच पावसाक लागून रद्द जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
