भांगरभूंय | प्रतिनिधी
कॉर्पोरेट आनी समाजीक संस्थां मदलें सहकार्य घटमूट करपाचो उपक्रम
दिवचल: गोंयांतलो एक आगळो वेगळो आनी इतिहासीक उपक्रम म्हूण विद्या भारती गोंय हांच्या फुडाकारान गोवा चेंबर ऑफ कॉमर्स अॅण्ड इंडस्ट्री (जीसीसीआय) आनी साई इन्स्टिट्यूट, मोर्लें हांच्या पालवान सीएसआर-एनजीओ संमेलन आयोजीत केलें.
ह्या संमेलनाचो उद्देश उद्देग मळार आनी समाजीक संस्थां मदीं अर्थपूर्ण भागिदारी घडोवन समाज उदरगती खातीर एकठांय काम करपाचें आसा.
हे कार्यावळींत गोवा शिपयार्ड, परादीप फॉस्फेट्स, युनिकेम, फायनलेक्स, नेस्ले, मिनरल फावंडेशन, जेनो फार्मास्युटिकल्स आनी एमआरएफ ह्या सारक्या मुखेल कंपनींचे प्रतिनिधी हाजीर आशिल्ले. विवीध आपसेवी संस्थांनी आपल्या सीएसआर प्रकल्पांचें सादरीकरण कॉर्पोरेट प्रतिनिधीं मुखार केलें आनी ताका बरो प्रतिसाद मेळ्ळो.
कार्यावळीची सुरवात जीसीसीआयचे संचालक किरण बल्लीकर हांच्या येवकाराच्या उलोवपान जाली. तांणी उद्देग आनी समाजसेवा मळा वेल्या सहकार्याच्या माध्यमांतल्यान शास्वत विकास सादपाचें म्हत्व अधोरेखीत केलें.
मुखेल सोयरे डॉ. प्रमोद साळगांवकार हांणी आपल्या उलोवपांत, साळगांवकार घराणें सीएसआर ह्या संकल्पनेच्या आदी सावनूच समाजकार्यांत सक्रीय आसा. गरजेवंतां सयत फायदो वांटून घेवन हें आमच्या रगतांतच आसा. शिक्षण मळार कार्यरत आशिल्ल्या विद्या भारती सयत जोडिल्ल्याचो म्हाका अभिमान आसा. कारण खरी सक्षमीकरणाची वाट म्हणल्यार शिक्षण आसा अशें तांणी सांगलें.
विद्या भारतीचे अध्यक्ष डॉ. सीताराम कोरगांवकार हांणी आपल्या अध्यक्षीय उलोवपांत म्हणलें, अशे तरेचें सीएसआर-एनजीओ संमेलन गोंयांत पयलेच फावटी जाता. अशा कार्यावळींची चर्चा चडशी मुंबय, पुणें वा दिल्ली सारक्या म्हानगरांनी आयकूंक येता. पूण आयज गोंयान एक व्हड झेप घेतल्या. हें संमेलन म्हणल्यार ‘मॅचमेकींग मीट’ आसा. जंय कॉर्पोरेट्स आनी आपसेवी संस्था एकेमेकांक समजून घेवपा खातीर आनी दीर्घकाळा खातीर, परिणामकारक भागिदारी घडोवन हाडपा खातीर एकठांय आयल्यात. तांणी विद्या भारती गोंय पंगडाचे संयोजक प्रा. आत्माराम गांवकार आनी जीसीसीआयचें अभिनंदन केलें.
ह्या संमेलनांत तेजा गडेकार (जेनो फार्मास्युटिकल्स), प्रशांत गुंजीकर (गोवा शिपयार्ड), डी. व्ही. तेंडुलकार (परादीप फॉस्फेट्स) आनी संदीप हाल्याळी हांणी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
