भांगरभूंय | प्रतिनिधी
कोवीड काळांत सान पिरायेच्या भावांचेर केल्ले अत्याचार
पणजी: आगशी पुलीस स्टेशनाचे शिमेंत 2020 वर्सा दोगां सान पिरायेच्या भावांचेर असैमीक लैंगीक अत्याचार केल्ले. ह्या प्रकरणांत बाल न्यायालयान 30 वर्सां पिरायेच्या अस्तंत बंगलांतल्या तरणाट्याक दोशी थारायलाे. हे विशींचो आदेश बाल न्यायालयाचे अध्यक्ष सई प्रभुदेसाय हांणी दिलो.
ह्या प्रकरणांत आगशी पुलिसांनी 13 जुलय 2020 दिसा गुन्यांव दाखल केल्लो. ह्या प्रकरणांत पिडीत चल्यांचे आवयन कागाळ दाखल केल्ली. ते प्रमाण गोंयांत कोविडाक लागून लॉकडावन लागू केल्लें. ह्याच वेळार 1 एप्रील ते 30 जून 2020 ह्या काळांत अस्तंत बंगालांतलो 25 वर्सां पिरायेचो तरणाटो कागाळदाराच्या घरा रावतालो. तशेंच वयल्या काळांत दुबावीत चल्याचे कुडींत न्हिदतालो. ह्याच वेळार दुबावितान कागाळदाराच्या 9 वर्सां आनी 11 वर्सां पिरायेच्या चल्यांचेर असैमीक लैंगीक अत्याचार केले.
कागाळीची दखल घेवन आगशीचे तेन्नाचे पुलीस निरिक्षक उदय परब हांच्या मार्गदर्शना खाला उपनिरिक्षक मंदार परब हांणी दुबावीत तरणाट्या आड भारतीय दंड संहितेच्या, बाल कायद्याचें कलम आनी पॉक्सो कायद्याच्या विवीध कलमा खाला गुन्यांव दाखल करून 13 जुलय 2020 दिसा अटक केली.
ह्या प्रकरणांत पणजेंतल्या पयलो वर्ग न्यायालयान दुबाविताक पयलीं पुलीस कोठी दिली. ती सोंपले उपरांत बाल न्यायालयान दुबाविताक न्यायालयीन कोठी दिली.
मजगतीं, उपनिरिक्षक मंदार परब हांणी ह्या प्रकरणाचो तपास पुराय करून बाल न्यायालयांत आरोपपत्र दाखल केलें. उपरांत न्यायालयांत सुनावणी जाली तेन्ना सरकारी अभियोक्ता फ्रान्सीका नरोन्हा आनी स्वाती परब हांणी युक्तिवाद करून आरोपी आड वैजकी तशेंच हेर पुरावे सादर केले.
तशेंच न्यायालयांत पिडीत चल्यांची तशेंच साक्षिदारांची उरफाटी तपासणी केली तेन्ना तांणी आरोपी तरणाट्या आड दिल्ली साक्ष म्हत्वाची थारली. न्यायालयान दोनूय पक्षांची बाजू आयकून घेतली. उपरांत बाल न्यायालयाचे अध्यक्ष सई प्रभुदेसाय हांणी आरोपीक दोशी थारायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
