भांगरभूंय | प्रतिनिधी
पणजी : हणजूण पुलिसांनी बामणवाडो- सोलये, बार्देसांत १०.५३ ग्रॅम कोकेन आनी ६ लाख ८१ हजार ८०० रुपयांचे विवीध चलन जप्त केले. वांगडा ज्यूड बौसारी (४४) ह्या कॅमेरून नागरिकाक अटक केली. निळ्या रंगाची स्कुटरूय जप्त केली. हे विशीं हणजूण पुलीस उपनिरीक्षक रमेश हरिजन हांणी एनडीपीएस प्रकरणांत गुन्यांव नोंद केलो.
हे विशीं सविस्तर म्हायती अशी, २९ ऑक्टोबराक बामणवाड्यार एका व्हिला लागसार निळ्या रंगाचे स्कुटरीन (जीए-०३ -बीडी -११६४) वचपी एका मनशाक आडायलो. झडटी घेतना ताचे कडेन कोकेन आनी रोख रक्कम सांपडली. तपासणेंत १ लाख १० हजार रुपया किमतीचें १०.५३ ग्रॅम कोकेन आनी ६ लाख ८१ हजार, ८०० रुपयांचे विवीध तरेचे चलन सांपडले. जप्त केल्ले ड्रग्स आनी रोख रक्कम पंचनामो करून ताब्यांत घेतले. आरोपीक सध्या पुलीस बंदखणींत दवरल्यात. अटकेविशीं संबंदीत दुतावासाक कळोवन एफआरआरओक कळयलां. ह्या प्रकरणांत अटक केल्ल्या ज्यूड हांचे आड ह्यान पयलीं अंदूंच १८ जुलयाक ड्रग्ज प्रकरणांत क्रायम ब्रांचान गुन्यांव नोंद केल्लो. नामबोंग फ्रेड (२१) ह्या कॅमेरून तरणाट्याक ड्रग्स दिल्ल्या प्रकरणांत क्रायम ब्रांच ताचो सोद घेताले. हणजूण पुलीस क्रायम ब्रांच हांणी एकठांय कारवाय करून ज्यूड हाका अटक केल्ल्याची म्हायती पुलिसांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
