भांगरभूंय | प्रतिनिधी
ओशियनमॅन इवेंट; पर्यटन वॉर्डनूय निलंबीत
पणजी: पर्यटन खात्या कडल्यान मान्यताय घेनासतनाच करंजाळे दर्यादेगेर आंतरराष्ट्रीय ओशियनमॅन इवेंटाचें आयोजन केल्ले खातीर पर्यटन खात्यान मुंबयचे आयोजक कपील अरोरा हाका 50 हजारांचो दंड दिलो. पणजी पुलिसांनी हाचे पयलींच आयोजकां आड गुन्यांव नोंद केला. पर्यटन खात्याच्या अधिकाऱ्यांनी ही म्हायती दिली. पर्यटन वॉर्डनाकूय निलंबीत केलो.
करंजाळे दर्यादेगेर फाटल्या आयतारा ओशियनमॅन इवेंटाचें आयोजन केल्लें. ह्या इवेंटांत विवीध प्रकारच्या पेंवपा सर्तीचें आयोजन करतात. सर्तीक सुरवात जाली तेन्ना थळाव्या नुस्तेमारांनी विरोध केलो. हाका लागून दर्यादेगेर तणाव निर्माण जालो. घडणूक थळार पुलीस पावले उपरांत तांणी स्थिती नियंत्रणांत हाडली. पूण विरोधाक लागून हो इवेंट मदींच रद्द करपाची पाळी आयोजकांचेर आयली.
गोंय पर्यटन थळ सुरक्षा आनी देखभाल कायदो 2001 खाला ही कारवाय केली. परवानगे बगर पर्यटन थळांचेर कसलीच कार्यावळ करूंक येवची ना अशें पर्यटन संचालक केदार नायक हांणी म्हणलें. जीसीझॅडएमए आनी जिल्होधिकाऱ्या कडल्यान परवानो घेतिल्ल्याचो दावो आयोजकांनी तेन्ना केल्लो. तरी पर्यटन खातें, पणजी म्हापालिकेचो परवानो आयोजकां कडेन नाशिल्लो. पर्यटन खात्यान आतां कारवाय करतना 50 हजार रुपयांचो दंड दिलो.
इवेंटाक परवानगी दिवची न्हय: विरेश बोरकार
नुस्तेमार खात्यान रापण केल्लो वाठार अधिसुचीत करप गरजेचो आसा. अशा सुवातांनी उदका खेळ वा हेर कसल्याच इवेंटाक परवानगी दिवची न्हय अशी मागणी आमदार विरेश बोरकार हांणी केली. मंगळारा तांणी नुस्तेमार खात्याच्यो संचालिका शमीला मोंतेरा हांची भेट घेवन तांकां निवेदन दिलें. ह्या वेळार अजय खोलकार हांचे सयत शिरदोणचे परंपरीक नुस्तेमार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
