भांगरभूंय | प्रतिनिधी
राजकी पक्षांची मागणी; मतदार वळेरी उजळणी विशीं वेंचणूक आयोगाची राजकी पक्षां कडेन बसका
पणजी: मतदारां विशीं जे बीएलओ चुकीची म्हायती दितात, तांचेर कारवाय करपाची मागणी राजकी पक्षांच्या प्रतिनिधींनी वेंचणूक आयोगा कडेन केली. मुखेल वेंचणूक अधिकारी संजय गोएल हांणी मतदार वळेरी पडटाळणी विशीं (एसआयआर) राजकी पक्षांच्या प्रतिनिधी कडेन बसका घेतली. बसके वेळार ही मागणी जाली.
मतदार वळेरी पडटाळणेची प्रक्रिया 4 नोव्हेंबराक सुरू जातली. 7 फेब्रुवारी 2026 दिसा निमाणी मतदार वळेरी जाहीर जातली.
प्रदेश काँग्रेस अध्यक्ष अमीत पाटकार, भाजपाचे पुंडलीक रावत देसाय, गोवा फॉरवर्डाचे दुर्गादास कामत बसकेक हाजीर आशिल्ले.
मतदार वळेरी पडटाळणेच्या प्रक्रिये विशीं वेंचणूक अधिकाऱ्यांनी राजकी पक्षांच्या प्रतिनिधीक म्हायती दिली.
9 डिसेंबराक मतदार वळेरीचो मसुदो जाहीर जातलो. 8 जानेवारी 2026 मेरेन सुचोवण्यो तशेंच हरकतीं खातीर मसुदो उक्तो आसतलो. मतदारांनी सादुरताय बाळगून सुचोवण्यो वा हरकतींची नोंद करपाक जाय. बीएलओ कडल्यान हाचे पयलीं बऱ्योच चुकी जाल्यात. तांचेर मतदारांनी नदर दवरपाक जाय, अशें बसके उपरांत प्रदेश काँग्रेस अध्यक्ष अमीत पाटकार हांणी सांगलें.
2002 उपरांत म्हणल्यार 23 वर्सांनी मतदार वळेरीची खर पडटाळणी जाता. ज्या मतदारांक मरण आयलां तांचीं नांवां मतदार वळेरेंतल्यान काडूंक जाय. कांय लोक भायल्यान येवन गोंयांत स्थायीक जाल्यात. तांच्या नांवांचो आस्पाव करताना तांच्या राज्यांतल्या वळेरींत तांचीं नांवां नात, हाची खातरजमा जावपाक जाय, अशी मागणी केल्ल्याचें भाजपाचे प्रतिनिधी पुंडलीक रावत देसाय हांणी सांगलें.
सरकारी अधिकाऱ्यांच्या बदल्यांचो घेतले नियाळ
सरकारी अधिकाऱ्यांच्यो बदल्यो वेंचणुकेच्या कामा संबंदी जाल्या काय, हाची तपासणी जातली. वेंचणुकेच्या कामा कडेन संबंद आसलो जाल्यार सरकाराक बदली आदेशाचो फेरविचार करपाक सांगतले, अशें मुखेल वेंचणूक अधिकारी संजय गोएल हांणी बसके उपरांत सांगलें.
मतदार वळेरी पडटाळणीक लागून सरकारान अधिकाऱ्यांच्या बदल्यांचे आदेश जारी केल्या, अशी हरकत प्रदेश काँग्रेस अध्यक्ष अमीत पाटकार हांणी मुखेल वेंचणूक अधिकाऱ्यां कडेन मांडली. पश्चीम बंगाल भाजपान वेंचणूक आयोगा कडेन सरकारी अधिकाऱ्यांच्या बदल्यां विशीं कागाळ केल्या. गोंय सरकारान केल्ल्या बदल्यां विशीं प्रदेश भाजप अध्यक्ष दामू नायक हांणी वेंचणूक आयोगा कडेन तशीच कागाळ करची, अशी मागणी प्रदेश काँग्रेस अध्यक्ष अमीत पाटकार हांणी केल्या.
बीएलओंक दितले प्रशिक्षण
मतदार वळेरीच्या पडटाळणी विशीं बीएलओंक प्रशिक्षण दितले. राजकी पक्षांनी लेगीत बूथ पांवड्यार एजंटांची नेमणूक करची, अशी सुचोवणी केल्या, अशी म्हायती मुखेल वेंचणूक अधिकारी संजय गोएल हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
