रॅकेटलाॅन वस्ताद : आशुतोष पेडणेंकार

भांगरभूंय | प्रतिनिधी

सलाम फौजी

आपल्या देशाचें प्रतिनिधित्व करप हें जायत्या जाणांचें सपन, पूण थोड्यांकूच तें साध्य जाता. कांय जाणांक हे महत्वाकांक्षेचो रस्तो सशस्त्र दळां वरवीं हुपचो पडटा. नौदलांतले कॅप्टन आशुतोष पेडणेंकार. तांणी रॅकेटलाॅन खेळां कडेन आशिल्ल्या प्रतिभेक लागून संवसारीक मान्यताय मेळयल्या. रॅकेटलॉन म्हणल्यार कितें? जंय टेबल टेनिस, बॅडमिंटन, स्क्वॅश आनी टेनिस एका फाटल्यान एक खेळटात आनी दरेक खेळ वट्ट 21 गूण मेळोवन खेळटात. उपरांत चार खेळांतल्यान चड गूण मेळोवपी खेळगड्याक रॅकेटलॉन मॅचींत जैतिवंत थारायतात.

आशुतोष हे 1993 चे जीईसी इलॅक्ट्रॉनिक्स आनी दूरसंचार अभियांत्रिकी पदवीधर. नौदलांतले अधिकारी तशेंच संवसारीक सर्तीचे किताब घेवपी आंतरराश्ट्रीय खेळगडे.

कॅप्टन आशुतोष हांणी भुरगेपण आनी शाळेचीं वर्सां पणजे सारलीं. तांचे बापूय सरकारी पॉलिटेक्निकांत प्राध्यापक आशिल्ले.  ते 2002 वर्सा प्राचार्य म्हणून निवृत्त जाले.  कॅप्टन आशुतोषान पीपल्स हायस्कुलांत एसएससी मेरेन आनी उपरांत धेंपे कॉलेजींत शिक्षण घेतलें. मागीर 1989 वर्सा जीईसींत गेले. 1993 वर्सा पदवी मेळयली. त्या वर्सा गोंय विद्यापिठाच्या ईटीसी बॅचांत ते टॉपर आशिल्ले.

1994 वर्सा कॅप्टन आशुतोष भारतीय नौदलांत शस्त्रां निरिक्षण अधिकारी म्हणून भरती जाले. तांणी आरएंडडी, नाविक शस्त्रांचो दर्जो नियंत्रण ह्या मळार म्हत्वाच्या नेमणुकांचेर काम केलां. मुंबय, पुणे, हैदराबाद, विशाखापट्टणम हांगाच्या नेव्ही/ ट्रायसर्व्हिसेस थळांचेर अधिकाऱ्यां खातीर प्रशिक्षण प्रशिक्षक म्हणून नौदलांत 31 वर्सां मानाची सेवा पुराय केल्या.

तांच्या सेवेचीं निमाणीं वर्सां तांच्या आवडीच्या  खेळां मळार गेल्यांत. नौदलाच्या खेळां नियंत्रण मंडळाचे संयुक्त सचीव म्हूण ते वावुरल्यात. 24 वेगवेगळ्या खेळां विशयांतल्या 550 वयर खेळगड्यांची पुराय जापसालदारकी नौदलाच्या खेळां नियंत्रण मंडळांनी हाताळ्ळ्या आनी कॅप्टन आशुतोश हे एक मुखेल प्रशासक आशिल्ले. 2002 आनी 2008 वर्सा फ्लॅग ऑफिसर कमांडिंग इन चीफ हांणी दोन फावटीं आनी 2022 वर्सा एक फावट द चीफ ऑफ नेव्हल स्टाफान तांची तोखणाय करपी कमेडेशन कार्डां दिल्यांत.

कॅप्टन आशुतोष खेळां कुटुंबाच्या फाटभूंयेर आयिल्ले. तांचे आवय- बापूय दोगांय बॅडमिंटन आनी लॉन टेनिस खेळटाले. तांचे कडल्यानच ताणें बॅडमिंटन खेळ उखल्लो आनी कांपाल स्टेडियमांत राष्ट्रीय प्रशिक्षक रोशनलाल नाहर हांच्या मार्गदर्शना खाला प्रशिक्षण घेतलें. 1983 ते 199४ मेरेन गोंयांत बॅडमिंटनांत ते निर्विवाद एकेरी चॅम्पियन आशिल्ले आनी तांणी 11 वर्सां वयर त्या काळांत सब जुनियर/ जुनियर/ सिनियर मेन्स गटांत चड करून सगळे किताब जिखले. ताची भयण लीना पेडणेकारय जायतीं वर्सां बॅडमिंटनांतली गोंय राज्य चॅम्पियन आशिल्ली. हालींच तिणें थायलॅण्डांत जाल्ल्या संवसारीक वरिश्ठ बॅडमिंटन चॅम्पियनशिपांत बायलां एकेरी 50 प्लस सर्तींत कांस्य पदक मेळयलां.

नेव्हींत आशुतोषाच्या काम आसून लेगीत सदांच खेळां खातीर वेळ मेळटालो. टेबल-टेनिस, स्क्वॅश, बॅडमिंटन आनी लॉन टेनिस ह्या सगळ्या रॅकेट खेळांत तांची कुशळटाय आनीक वाडली. नेव्हींतले कारकिर्दींत तांणी नेव्ही भितर तशेंच राष्ट्रीय पांवड्यार जायत्यो स्क्वॅश चॅम्पियनशीप जिखल्यात. राष्ट्रीय पांवड्यार दिग्गज वर्गांत बॅडमिंटनांत तांणी जायते किताब मेळयल्यांत. आंतरराश्ट्रीय सर्तींनी भारताचें प्रतिनिधित्व केलां. 2018 वर्सा रॅकेटलॉन खेळांत तांणी संवसारीक चॅम्पियनशीप जिखली. 2018 त झुरिचांत जाल्लें सोळावें संवसारीक रॅकेटलॉन चॅम्पियनशीप तांणी जैत जोडलें. हो पराक्रम करपी ते एकलेच भारतीय. तांणी दादल्यांच्या 45 प्लस एकेरी सर्तींत भांगरा पदक जिखलां आनी दादल्यांच्या उक्त्या हौशी विभागांतय काश्यां पदक मेळयलां. 

2019 वर्सा तांणी ताचे उपरांत लायपसिक सुवाळ्यांत जाल्ल्या 17 व्या संवसारीक रॅकेटलॉन चॅम्पियनशिपांत रुप्यां पदक मेळयलें. ह्या चॅम्पियनशिपांत तांणी अमेटर वर्गांतल्या भारतीय पंगड रॅकेटलॉन विश्वचषक पंगड चॅम्पियनशिपांतय कॅप्टन म्हणून काम केलें. थंय पयलेच खेपे भारतीय पंगडान चॅलेंजर्स कपांत पयलो किताब जिखलो. कोविड उपरांत तांणी परत एक पावटीं वर्ल्ड रॅकेटलाॅन सर्तींत व्हिएन्नांत वांटो घेतलो. जंय तांणी 3 भांगरा पदकां जिखलीं. हें करपी ते पयलेच भारतीय हांगा तांणी गोल्ड इन सिंगल्स, डबल्स आनी तशेंच मिक्स डबल्स (50 वर्सां वयर) मेळयली.

सध्या ते ऑगस्ट 2026 त रॉटरडॅमांत जावपी संवसारीक चॅम्पियनशिपाची तयारी करतात. 55 वर्सां वयल्या रॅकेटलाॅ न एकेरी खेळांत 5 वें वैयक्तीक संवसारीक चॅम्पियनशीप जिखपाचो हेतू दवरला.

– जाॅन आगियार