भांगरभूंय | प्रतिनिधी
एमपीएचे अध्यक्ष एन. विनोदकुमार हांचो दावो
मुंबयः मुरगांव बंदरांत कोळश्याक लागून जावपी प्रदुशणांत बरोच उणाव जाला. मुरगांव बंदर प्राधिकरणान घेतिल्ल्या विंगड विंगड शाश्वततायेच्या उपक्रमांक लागून कोळशाक लागून धुल्ल उडपाचें प्रमाण बरेंच देवलां, अशें गोंय प्रदुशण नियंत्रण महामंडळान दाखयल्ल्या मानांकनातल्यान दिसून आयलां. ते भायर मुरगांव बंदराक देशांतलें पयले हरीत बंदर म्हण मान्यताय फावो जाल्या, अशें एमपीएचे चेअरमन एन विनोदकुमार हांणी सांगलें.
गोरेगांव मुंबय घडोवन हाडिल्ले इंडीया मॅरीटायम सप्तकाच्या गोंय सत्रांत एमपीएचे अध्यक्ष एन. विनोदकुमार हांणी उलयतना सांगलें, बंदरांत प्रदुशणाचेर चडांत चड प्रमाणांत नियंत्रण दवरपा खातीर एमपीएन जायते शाश्वत उपक्रम हातांत घेतल्यात.
बंदरांत कोळश्याची धुळ वार्यांत घोळची न्हय म्हूण आमी धांपिल्ले डॉम उबारल्यात. हे डॉम उबारपी मुरगांव बंदर हें देशांतलें दुसरें बंदर जावन आसा. ह्या डॉमा भितर कोळश्याची हाताळणी केल्ल्यान प्रदुशणाचेर बर्याच प्रमाणांत नियंत्रण आयलां. ते भायर प्रदुशणाचेर नियंत्रण दवरपा खातीर नेनो पार्टीकल रसायन स्प्रे करतात, अशी म्हायती विनोदकुमार हांणी दिली.
तशेंच हें रसायन स्प्रे करपा खातीर आमी उदकाचो कसलोच इबाड कररिनात. सिवरेज महामंडळाच्या जोडपालवान आमी ४ कोटी खर्चून बायणा सिवेज प्रक्रीया प्रकल्प ते मुरगांव बंदर मेरेन एक किलोमिटर लांब उदकाचें पायप घालां. ह्या पायपांतल्यान सिवेजीचेर प्रक्रीया केल्ल्या नितळ उदकाचो वापर आमी शाश्वत रितीन कोळश्याचेर स्प्रे करपा खातीर वापरतात, अशें विनोदकुमार हांणी म्हणलें.
ह्या उपक्रमांक लागून कोळश्याचेर बर्याच प्रमाणांत नियंत्रण आयलां. गोंय प्रदुशण नियंत्रण मंडळान जारी केल्ल्या मानांकना प्रमाण प्रदुशण पातळी पीएम १० ही २०२४ त ८० मेरेन आसली आनी तातूंत ५८ टक्के उणाव जावन ही पातळी ३४ मेरेन पावल्या. जाल्यार पीएम २.५ ही प्रदुशण पातळी २०२४ त २० मेरेन आसली आनी २०२५ त तातूंत ३० टक्के उणाव जावन ही पातळी १४ मेरेन पावल्या, अशें विनोदकुमार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
