भांगरभूंय | प्रतिनिधी
पेडणें: हस्तकला महामंडळाचे चेअरमन तशेंच पेडणेंचे आमदार प्रवीण आर्लेकार हांचे समर्थक पत्रकार महादेव गवंडी हांणी महामंडळ संचालक पदाचो राजिनामो सादर केलो. हाका लागून पेडणेंच्या ह्या विशयाचेर बरीच चर्चा जाली.
संचालक महादेव गवंडी हांणी, आपूण हो राजिनामो वैयक्तीक कारणा खातीर दिता अशें सांगलें.
साडेतीन वर्सां ते ह्या संचालक पदाचेर कार्यरत आशिल्ले. मात हीं साडेतीन वर्सां संचालक मंडळाची एकदांच मिटींग जाल्ली. ताचे उपरांत कसल्योच हालचाली जावंक नात. संचालक महादेव गवंडी हांणी बसकेंत जायते मुद्दे मांडिल्ले. तातूंत हस्तकलाकारांक न्याय मेळचो, सगल्या हस्तकलाकारांक एके माचयेर हाडून तांच्यो समस्या, तांचे प्रस्न, तांचे कलेक वाव दिवचो अशी सुचवणी केल्ली. तशेंच हस्तकला महामंडळाचे जंय कावंटर शोरूम आशिल्ले ते बंद पडल्यात. ते कार्यरत करचे. तशेंच मोपा आंतरराष्ट्रीय विमानतळार पेडणें बस स्टॅण्डाचेर नवो कावंटर सुरू करून हस्तकलाकारांक ताचें सामान दिवप- घेवप, विक्री प्रदर्शन करपा खातीर कवंटर नवे सुरू करचे अशी मागणी संचालक गवंडी हांणी केल्ली. मात तांचीय कार्यवाही जावंक नाशिल्ल्यान तांणी ह्या पदाचो राजिनामो दिला.
हस्तकला महामंडळाचे संचालक म्हणून पेडणें म्हालांतल्यान वट्ट चार वांगड्यांची निवड आमदार प्रवीण आर्लेकार हांणी संचालक म्हणून केल्ली. तातूंत पत्रकार महादेव गवंडी, मोपा सरपंच सुबोध महाले आनी पेडणें मतदारसंघाचे भाजप मंडळाचे आदले अध्यक्ष परब हांची निवड जाल्ली.
महामंडळाच्यो प्रदर्शन विक्री कार्यावळी खुबश्या सुवातांचेर जाताल्यो. मात ते कार्यावळींत संचालक खंयच दिसनाशिल्ले. हाका लागून महादेव गवंडी हांकां तांचो इश्ट परिवार, लोक विचारताले, तुमी हस्तकला महामंडळाचेर कितें करतात? हस्तकलाकारांचे प्रस्न कित्याक सोडयनात? ह्या प्रस्नांची जाप ते केन्नाच दिनाशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
