भांगरभूंय | प्रतिनिधी
म्हापशें ः हणजूण- कायसूवच्या सरपंचपदार सुरेंद्र गोवेकार हांची विरोधाविणें निवड जाली. आदले सरपंच लक्ष्मीदास चिमुलकार हांणी राजीनामो दिल्ल्यान हें पद रितें आशिल्लें.
मंगळार २८ ऑक्टोबराक सकाळीं सरपंचपदाचे निवडी खातीर पंचायत मंडळाची बसका जाली. ह्या वेळार उपसरपंच स्मिता खोर्जुवेंकार, दिनेश पाटील, सुरेंद्र गोवेंकार, अनुप मांद्रेंकार, प्रतिमा गोवेंकार, सुदेश पार्सेकार, लक्ष्मीदास चिमुलकार, निकिता गोवेंकार, ऍग्नेस कार्व्हालो, शीतल नायक हे पंचायत वांगडी हाजीर आशिल्ले. जाल्यार रोमाल्डीना मेंडोन्सा ही हाजीर रावंक ना.
सरपंचपदा खातीर गोवेकर हांचो एकूच अर्ज आयिल्ल्यान तांची विरोधा विणें निवड जाल्ल्याची घोशणा अधिकार्यांनी केली. ह्या वेळार वेंचणूक अधिकारी म्हणून गटविकास अधिकारी कार्यालयाचे विस्तार अधिकारी शिरीषकुमार तारी हांणी काम पळयलें. तांकां पंचायत सचीव रूई कार्दोज हांणी सहकार्य केलें.
मजगतीं, आतांच्या पंचायत मंडळांत जाल्ल्या अलिखीत समजिकाय कबलाती प्रमाण सरपंचपद हें विभागून घेवपाचो निर्णय घेतिल्लो. तशेंच लक्ष्मीदास चिमुलकार आनी सुरेंद्र गोवेकार हांणी हें सरपंचपद सांबाळचें, अशें थारिल्लें. तीन वर्सांचो काळ पुराय जाल्ल्यान चालू म्हयन्याच्या पयल्या सप्तकांत चिमुलकार हांणी पदाचो राजीनामो दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
