भांगरभूंय | प्रतिनिधी
पणजी : सरकारी कर्मचार्यांचे ६० दिसां परस चड काळाचे रजेक लागून निर्माण जाल्ल्या पदांची (लिव्ह व्हेकन्सी) भरती ह्यान फुडें गोंय मनीसबळ विकास महामंडळा वरवींच करतले. हे विशीं कार्मीक खात्यान सगलीं खातीं, महामंडळां आनी स्वायत्त संस्थांक आदेश जारी केल्यात. अश्या सुवातांचेर महामंडळ सोडल्यार भायले हेर कंत्राटी कर्मचारी नेमचे न्हय अशें आदेशांत स्पश्ट केलां.
आदेशा प्रमाण, नेमान कर्मचार्यांची पगारा बगर रजा, प्रसुती, अभ्यास रजा, बालसंगोपन, अर्जित रजा, एक्स्ट्राऑर्डिनरी रजा वा हेर तरेच्या साठ दिसां परस अदीक रजांच्या काळांत क्लेरिकल सुवातां खातीर फकत मनीसबळ विकास महामंडळा कडल्यान कर्मचारी आवटसोर्स करतले. हातूंत एमटीएस, चालक, कनिश्ठ कार्यालयीन सहाय्यक, एलडीसी, डेटा एन्ट्री ऑपरेटर, खाजगी सहाय्यक, स्टेनो या पदांचो आसपाव केला.
ह्यान पयलीं कार्मिक खात्यान महामंडळा कडल्यान हेर सरकारी खात्यांत तैनात केल्ल्या खंयच्याय कर्मचार्यांची नियुक्ती अचकीत रद्द करची न्हय अशे आदेश जारी केल्ले. महामंडळांतल्यान सरकारी खात्यांत तैनात आशिल्ल्या खंयच्याय कर्मचार्यांक काडून उडोवचे पयलीं महामंडळाक तांच्या कर्मचार्यां खातीर पर्यायी वेवस्था करची पडची म्हूण महामंडळाच्या वेवस्थापकीय संचालकांक पयलींच म्हायती दिवची अशेंय त्या आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
