भांगरभूंय | प्रतिनिधी
जोयडा, खबरां संस्था: कारवार-गोंय शिमेवेल्या माजाळी तपासणी नाक्यार तपासणे मजगतीं खासगी बसींत पुलिसांक वट्ट रु. १ कोटी अवैध रक्कम सांपडली. ती गोंयच्यान बंगळुरू व्हरताले अशी म्हायती मुखार आयल्या.
ही घडणूक मध्यान रातीं घडली. नेमान जावपी तपासणे मजगतीं पुलिसांनी बसींतल्या प्रवाशांचीं बॅगां तपासलीं तेन्ना, राजस्थानच्या कल्पेश कुमार नांवाच्या प्रवाशाचे बॅगेंत व्हडा प्रमाणांत रक्कम आशिल्ल्याची दिसली. ताचे वांगडा भामृकुमार नांवाचो आनीक एक मनीस प्रवास करतालो, अशें पुलिसांनी सांगलें.
जप्त केल्ली रक्कम उच्च मोलांच्या नोटांची आसा. हे रकमेचो धनी आनी स्त्रोत हे विशीं आजूनय स्पश्ट जावंक ना. ह्या प्रकरणांत चित्तकुल (सदाशिवगड) पुलीस स्टेशनांत गन्यांव दाखल केल्ल्यान सध्या तपास सुरू आसा.
मुळावे चवकशेंत हे रकमेचो संबंद बेकायदेशीर वेव्हार, हवाला नेटवर्क वा राजकी निधी कडेन आसपाक शकता, अशी शक्यताय पुलिसांनी उक्तायली. तशेंच, हे विशीं आजूनय अधिकृत पुश्टी जावंक ना. हे कारवाये उपरांत शिमेवेल्या वाठारांत पुलिसांनी आंतरराज्य मार्गार तपासणी अदीक खर केल्या. ही रक्कम खंयच्यान आयली आनी खंय वचपाक आशिल्ली हाचो पुलीस तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
