भांगरभूंय | प्रतिनिधी
बेळगांव : गोंयाक मुखेल भाजी पुरवणदार आशिल्ल्या जय किसान भाजी बाजाराचेर चालू आशिल्ल्या वादाचे फाटभुंयेर जय किसान भाजी मार्केटान घाल्ली याचिका कर्नाटक उच्च न्यायालयान भायरायली.
याचिकादारांनी उच्च न्यायालयांत वच्चें पयलीं कर्नाटक प्रशासकी न्यायाधिकरणा (केएटी) वरवीं उपाय सोदपाक जाय आशिल्लो अशें न्यायालयान नमूद केलां. सरकारान जारी केल्ले वेपार परवाने आनी खात्याच्या निर्णया संबंदीच्यो गजाली लवादाच्या अधिकारांत आसात, अशें तातूंत म्हणलां.
अनियमितताय आनी शेतकी विपणन नेमांचो भंग केल्ल्यान शेतकी खात्यान बाजाराचो परवानो रद्द केले उपरांत ही केस सुरू जाल्ली. मुळांत शेतकारांक मजत करपा खातीर तयार केल्लो हो प्रकल्प आपल्या उद्देशा पसून भरकटला, जाका लागून खाजगी वेपाऱ्यांक ताचे बदला आपल्या कामकाजाचेर नियंत्रण दवरपाक मेळ्ळें असो दावो अधिकाऱ्यांनी केलो.
हालींच मंत्री सतीश जारकीहोळी हांणी ह्या प्रकरणांत वांटो घेवन शेतकी खात्याक बाजाराच्या कामकाजाची तपासणी करपाची आनी दावो केल्ल्या उल्लंघनांचेर गरजेची कारवाय करपाची सुचोवणी केली. थळाव्या शेतकार संघटणांनी जायत्यो कागाळी केले उपरांत ताचो सहभाग आयलो, तांणी बाजारांतल्यो कार्यावळी आतां शेतकार-केंद्रीत हेतू साध्य करूंक शकनात असो युक्तिवाद केलो.
तांच्या सुचोवण्या प्रमाण शेतकी खात्यान चवकशी सुरू केली आनी निमाणें परवानो रद्द केलो, ह्या निर्णयाक जय किसान मार्केटाच्या वेवस्थापनान न्यायालयांत आव्हान दिल्लें.
त्याच वेळार जय किसान मार्केटाच्या भूंय वापर बदलाच्या आदेशा विशींचे एके वेगळे याचिकेचेर 3 नोव्हेंबराक सुनावणी जावपाची आसा. ह्या प्रकरणांत ह्या जाग्यार वेवसायीक वेव्हार बेळगांवी शार नियोजन आनी झोनींग नेमांक पाळो दिता काय ना हें थारायतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
