भांगरभूंय | प्रतिनिधी
पणजी: आयच्या काळांत शास्वत होच सगल्यांत म्हत्वाचो घटक आसा. ‘ग्रीन पोर्ट इनिशिएटिव्हचो भाग म्हूण आमी आमच्या बंदराच्यो मुळाव्यो सुविधा शास्वत पद्दतीन विकसीत करतात अशें मुरगांव बंदर प्राधिकरणाचे (एमपीए) अध्यक्ष एन. विनोदकुमार हांणी सांगलें.
गोरेगांव- मुंबय हांगा सुरू आशिल्ल्या इंडिया मॅरिटायम वीक (आयएमडब्ल्यू) मजगतीं एमपीएच्या पॅव्हेलियनाचें उक्तावण केले उपरांत ते उलयताले. ह्या पॅव्हेलियनांत मुरगांव बंदराचो इतिहास, ताची म्हाल व्हरपाची तांक आनी ग्रीन पोर्ट उपक्रम हाचेर विशेश भर दिला.
राष्ट्रीय आनी आंतरराष्ट्रीय पांवड्या वेले प्रतिनिधी तशेंच दर्या मळा वेले विवीध भागधारक पॅव्हेलियनाक भेट दिवन बंदराच्या कामकाजा विशीं आनी ग्रीन पोर्ट उपक्रमां विशीं म्हायती घेत आसात.
एमपीएच्या पॅव्हेलियनांत फुडल्या तीन ते पांच वर्सांत राबयतल्या म्हत्वाच्या प्रकल्पांचें प्रदर्शन केलां. तशेंच 2047 मेरेनच्या बंदर विकासाच्या मास्टर प्लॅनाचें दर्शनूय घडोवन हाडलां. हे सगले ग्रीन पोर्ट उपक्रमाच्या संकल्पने कडेन निगडीत आसात अशें विनोदकुमार हांणी सांगलें.
दरेक दर्या बंदरा खातीर टिकावूपण गरजेची आसा. एमपीएन ग्रीन उपक्रमा खाला खूबशे प्रकल्प हातांत घेतल्यात. हाचोच भाग म्हूण आमकां पयलें ग्रीन पोर्ट प्रमाणपत्रूय फावो जालां अशी म्हायती विनोदकुमार हांणी दिली.
आमी आमच्या बंदराच्या मुळाव्या सुविधां मदीं गुंतवणूक करीत आसात. पूण ती पुरायपणान शास्वत पद्दतीन करपाचेर आमचो भर आसा. हीच आमची मुखेल भुमिका आसा अशेंय विनोदकुमार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
