भांगरभूंय | प्रतिनिधी
मुख्यमंत्रीः दर्या मळार गुंतवणूक करपाक भागधारकांक मारलो उलो
पणजी: सगल्या दर्या संबंदीत कामां खातीर सिंगल विंडो मंजुरी मेळोवपाच्या उद्देशान गोवा मॅरिटायम बोर्ड स्थापणुकेचेर तशेंच गोवा मॅरिटायम मास्टर प्लॅन तयार करपाची प्रक्रिया सुरू आसा अशी म्हायती मुख्यमंत्री डॉ. प्रमोद सावंत हांणी दिली. तशेंच राज्यांतल्या दर्या मळार गुंतवणूक करपा खातीर भागधारकांक मुख्यमंत्र्यांनी उलो मारलाे.
गोरेगांव- मुंबय हांगा घडोवन हाडिल्ले इंडिया मॅरिटायम सप्तकाच्या गोंय सत्राक संबोदीत करतना मुख्यमंत्री उलयताले. ह्या सत्राचो विशयय आसलो ‘ब्ल्यू मीट्स ग्रीन: गोवा मॉडेल फॉर सस्टेनेबल मॅरिटायम डेव्हलपमेंट’ ह्या वेळार बंदर खात्याचे मंत्री दिगंबर कामत, उदका मार्ग खात्याचे मंत्री सुभाष फळदेसाय, मुरगांव बंदर प्राधिकरणाचे अध्यक्ष एन. विनोदकुमार, कॅप्टन ऑफ पोर्ट्स ऑक्टाविओ रॉड्रिग्ज आनी हेर मानेस्त हाजीर आशिल्ले.
आमी गोंय राज्य समीती स्थापन केल्या. ह्या समितीच्या मार्गदर्शनांतल्यान राज्य मॅरिटायम मास्टर प्लॅन तयार करपाक सुरवात जाल्या. आमच्यो न्हंयो आनी दर्यादेगो नितळ दवरप राज्यांक कार्गो आनी प्रवासी येरादारी खातीर कार्यक्षम करप हो आरखड्याचो हेत आसा अशें मुख्यमंत्र्यांनी म्हणलें.
ह्या मॅरिटायम मास्टर प्लॅनांत नवी पर्यटन मार्ग, आधुनीक नुस्त्या वेयवसाय मुळाव्यो सुविधा, बोट बांदणीचाे विस्तार आनी सुदृढ दर्या लॉजिस्टिक्स हांचो आस्पाव आसा जी गोंया खातीर ‘ब्ल्यू इकॉनॉमी’ घटमूट करता अशें मुख्यमंत्र्यांनी सांगलें.
शिपबिल्डींग व्हिजन 2047 डोक्युमेंटांत सर्वसमावेशक बोट बांदणी धोरण रोखडेंच चालीक येतलें. गोंय बोट बांदणी मळार भारतीय आनी आंतरराष्ट्रीय गिरायकां खातीर प्रगत बोटी बांदल्यात जातूंत पुराय इलेक्ट्रीक आनी हायब्रीड बोटींचो आस्पाव आसा अशी म्हायती मुख्यमंत्र्यांनी दिली.
मुरगांव बंदरांतले आंतरराष्ट्रीय आनी देशी क्रुझ टर्मिनल्स ह्या पर्यटन क्षेत्राक नवी दिका दितात. पणजेची नव टर्मिनल इमारत पुराय जायत आयल्या. जी उदका पर्यटनाक प्रोत्साहन आनी दर्या सुरक्षेक घटाय दितली अशें मुख्यमंत्र्यांनी सांगलें.
गोंयांत सात सासणाच्यो जेटी आनी राष्ट्रीय उदका मार्गांचेर 44 जेटी उबारपाचो प्रस्ताव आसा. प्रस्तावीत वॉटर टॅक्सी सेवा रस्त्या वेली गर्दी कमी करून येरादारीचो वेळ वाटावपाक मजत करतली. मुंबय-गोंय ह्या मार्गार उदका येरादारी सेवा सुरू करपाचो विचार चालू आसा अशी म्हायती मुख्यमंत्र्यांनी दिली.
गोंय बोट बांदणी मळार नंबर वन राज्य करपाचो आमचो उद्देश आसा. हे खातीर आमकां गोंयांत उद्देजक आनी गुंतवणुकदारांचो वांगड आनी मजत लागतली. आमकां देशांतल्या खंयच्याय राज्या कडेन सर्त करपाची तांक आसा.
दिगंबर कामत, बंदर मंत्री
गोंयांतली वॉटर टॅक्सी येवजण कोची वॉटर मेट्रोच्या जोड पालवान तयार करतात. हे येवजणेक लागून पर्यटन, वेपार, उद्देग आनी रोजगार मळार नव्यो संदी तयार जातल्यो. ह्यो वॉटर टॅक्सी राष्ट्रीय उदका मार्गाचेर तैनात करून, जे इतिहासीक किल्ले, देवळां आनी इगर्जेंक जोडटले.
सुभाष फळदेसाय, उदका मार्ग मंत्री
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
