भांगरभूंय | प्रतिनिधी
घरगुती वीज दरवाड फक्त 5 टक्के
पणजी: आंदोलन वा घेरावाक हांव भियेना. आंदोलन करचे पयलीं काँग्रेस वा आपान अभ्यास करचो आनी उपरांत उलोवचें अशें वीज मंत्री सुदिन ढवळीकार हांणी स्पश्ट केलें. घरगुती गिरायकां खातीर फक्त 5 टक्के वीज दरवाड जाल्या. तशेंच वेळे प्रमाण (टीओडी) वीज दर घरगुती गिरायकां खातीर लागू करपाचो प्रस्ताव ना. स्मार्ट मिटर बसयले उपरांत हाचेर विचार जातलो अशें तांणी स्पश्ट केलें.
वीज मंत्री सुदिन ढवळीकार हांणी सोमारा पत्रकार परिशद घेतली. ह्या वेळार मुखेल वीज अभियंते स्टिफन फर्नांडीस हाजीर आसले.
जोड वीज नियमन आयोगान (जेईआरसी) मान्यताय दिले उपरांत ऑक्टोबर सावन घरगुती विजेचे दर वाडल्या. ही दरवाड 5 टक्के आसा. 100 युनिटा मेरेन पयली 1.90 रुपया प्रती युनीट दर आसलो तो आता 1.95 रुपया जाला. ही वाड 2.6 टक्के आसा. 101 ते 200 युनिटा मेरेन पयली 2.80 रुपया आसलो तो आतां युनिटा फाटल्यान 2.90 रुपया जाला. 201 ते 300 युनिटा मेरेन 3.70 रुपया बदला आतां 3.90 रुपया दर आसतलो. 301 ते 400 युनिटा मेरेन 4.9 रुपयांच्या जाग्यार आतां 5.15 रुपया फारीक करचे पडटले. ही वाड 5 टक्के आसा. 401 युनिटा वयर 5.80 रुपयांच्या जाग्यार 6.2 रुपया दर आसतलो. ही वाड 6.9 टक्के आसा.
घरगुती गिरायकां खातीर सध्यातरी वेळे प्रमाण (टीओडी) वीज दर लागू करपाचो प्रस्ताव ना. स्मार्ट मिटर बसयले उपरांत टीओडी लागू करपाच्या प्रस्तावाचेर विचार जातलो. उद्देगां खातीर टीओडी लागू जाला, अशें वीज मंत्री सुदिन ढवळीकार हांणी सांगलें.
काँग्रेस वा आप हांणी वीज दर वाडीचो अभ्यास करचो आनी उलोवचें. सामान्य मनशा खातीर वीज दरवाड उणी आसा, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
