भांगरभूंय | प्रतिनिधी
खोर्जुवें फेरी धक्यार दुर्घटणा, चालक वाटावलो
भांगरभूंय । प्रतिनिधी
म्हापशें : खोर्जुवें, हळदोणेंच्या फेरी धक्या वयल्यान जीप थेट न्हंयेंत गेली. बऱ्या नशिबान जीप चालक अमनदीप सिंग मुल्तानी (रा. मयडें बार्देस आनी मूळ चंदीगड) पेंवन वयर सरिल्ल्यान वाटावलो. गुगल मॅप लोकेशनाक लागून हो अपघात जालो.
ही दुर्घटणा सोमारा फांतोडेर 2 वरांच्या सुमाराक घडली. अमनदीप हो जीए 08 आर 2154 नंबराचे उक्ते जिपींत खोर्जुवेंच्यान मयडेंचे दिशेन गुगल लोकेशनाचो आदार घेवन वतालो.
घडणुके वेळार घोग्यांनी पावस पडटालो. ही जीप खोर्जुवेंच्या बंद आशिल्ल्या फेरी धक्यार पावली. चालकाक अदमास येवंक नाशिल्ल्यान जीप थेट न्हंयेंत गेली. चालक अमनदीप हाणे दार उक्तें करपाचो यत्न केलो, मात उदकाक लागून तें उक्तें जायना जालें. निमाणे कडेन उक्ते जिपीच्या वयल्या प्लास्टिकाच्या टपाक आशिल्ली सांखळ काडून तो फाटले वटेन उदकांत देंवलो आनी पेंवत न्हंयेंतल्यान वयर आयलो. उपरांत तो मयड्यां आपल्या घरा गेलो.
सकाळीं 10.30 वरांच्या सुमाराक म्हापशें पुलिशेक घडणुकेची म्हायती दिली. ते उपरांत म्हापशें उजो पालोवपी दळाक आपयलो. उजो पालोवपी दळाचे उपअधिकारी प्रकाश कान्नायक हांच्या फुडारपणा खाला जवानांनी थळावे तरणाटे अमन, निलेश आनी योगेश हांचे मजतीन गरो घालून बुडिल्ले जिपीचो सोद लायलो. उपरांत ती राजू बांदून ओडून भायर काडली. मजगतीं, थळावे आमदार अॅड. कार्लुस फेरेरा हांणी घडणुकेचे सुवातेक भेट दिली. हाचे फुडें हे सुवातेर अशे अपघात जावचे न्हय म्हूण बंद आशिल्ल्या फेरी धक्यार दोनूय वटांनी बॅरिकेड घालचे, अशी मागणी न्हंय येरादारी खात्या कडेन पत्र धाडून करतले. तशेंच गुगल लोकेशनाचो आदार घेतना वाहन चालकांनी जतनाय घेवची, असो अॅड. फेरेरा हांणी उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
