भांगरभूंय | प्रतिनिधी
सुदीन ढवळीकार म्हजो गळो कापचे नात हो विस्वास
पणजी : मगो – भाजप युतीचो उमेदवार वा अपक्ष म्हणून हांव फोंडें पोट वेंचणूक लढयतलों, अशें प्रतिपादन डॉ. केतन भाटीकार हांणी केलें. हांव आजूनय मगो पक्षांत आसा. म्हजे फुडारी सुदीन ढवळीकार म्हजो गळो कापचे नात, असो विस्वास म्हाका आसा अशें तांणी स्पश्ट केलें.
प्रुडंट मिडिया वाहिनीक दिल्ले हेड ऑन मुलाखतींत ते उलयताले. प्रुडंट मीडीयाचे संपादक संचालक प्रमोद आचार्य हांणी ही मुलाखत घेतली.
फोंडेंचे आमदार, कृषीमंत्री रवी नायक हांच्या मरणाक लागून येवपी स म्हयन्यांनी फोंडें मतदारसंघांत पोटवेंचणूक जातली. हाका लागून फोंडें पोटवेंचणुकेच्या उमेदवारां विशींचे चर्चेक आतां ओतो आयला.
रवी नायक हांचो पूत रितेश नायक हांकां उमेदवारी दिल्यार फाटबळ दिवपाचें ह्यान पयलींच मगोचे अध्यक्ष दीपक ढवळीकार हांणी जाहीर केलां. फोंडें पोटवेंचणुकेंत कोणूच उमेदवार बिनशर्त वेञचून येवचे ना. देशांत लोकशाय आसा. फोंडें मतदारसंघांतले जनतेक आपलो आमदार निवडपाचो अधिकार आसा. हाका लागून वेंचणूक जावंदी. सर्वोत्कृश्ट उमेदवार वेंचून येतलो. हांवूच न्हय तर हेरांकूय वेंचणूक लढपाचो अधिकार आसा अशें तांणी म्हणलें.
भारतीय जनता पक्षान आजूनय उमेदवारी जाहीर करूंक ना. प्रदेश अध्यक्ष दामू नायक हांणीय रितेशाक उमेदवारी मेळटली, अशें जाहीर करूंक ना. उमेदवार वेंचून काडपाची पक्षाची प्रक्रीया आसता, ते प्रमाण उमेदवार वेंचतले, अशें तांणी म्हणलें.
रवी नायक हांचे कडेन कितले मतभेद आसले तरी म्हाका तांचे विशीं आदर आसा, अशेंय तांणी म्हणलें. मगो फुडारी सुदीन ढवळीकार हांचे विशीं म्हाका खूब आदर आसा. अपक्ष उमेदवारी जाहीर केली तरी तांकां नमस्कार करूनच हांव उमेदवारी दाखल करतलों, अशेंय भाटीकार हांणी ह्या वेळार स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
