भांगरभूंय | प्रतिनिधी
म्हापशें ः खोर्जुवें, हळदोणच्या फेरी धोक्यावेल्यान जीपगाडी सरळ न्हंयेंत गेली. गाडी चालक अमनदीप सिंग मुल्तानी (रा. मयडे बार्देस आनी मूळ चंदीगढ) हो तरणाटो पेंवून आयिल्ल्यान वाटवलो. गुगल मॅप लोकेशनाक लागून हो अपघात जालो.
ही घडणूक सोमारा सकाळीं सुमार २ वरांचेर घडली. अमनदीप हो जीए ०८ आर २१५४ नंबराचे उक्ते जीप गाडयेन खोर्जुवेंच्यान मयड्यां वटेन गुगल लोकेशनाचो आदार घेवन वतालो.
घडणुके वेळार नेटान पावस झडटालो. ही जीप खोर्जुव्यां बंद आशिल्ल्या फेरी धोक्यार पावली आनी चालकाक अदमास येवंक नाशिल्ल्यान तांची सरळ गाडी न्हंयेंत घुसली. चालक अमनदीप हांणी दार उगडपाचो यत्न केलो. मात उदकाक लागून दार उगड नाशिल्लें. निमाणें तो उक्ते जिपी वयर भोंवतणी आशिल्ल्या प्लास्टीकाची चेन काडून तो फाटले वटेनच्यान उदकांत देंवलो आनी पेंवत न्हंयें भायर आयलो आनी मयड्यां आपल्या घरा गेलो.
सकाळीं सुमार १०.३० वरांचेर म्हापशें पुलिसांक घडणुकेची म्हायती दिली. उपरांत म्हापशें उजो पालोवपी दळाक संपर्क केलो. उजो पालोवपी दळाचे उपअधिकारी प्रकाश कान्नायक हांच्या नेतृत्वाखाला जवानांनी थळावो तरणाटो अमन, निलेश आनी योगेश हांचे मजतीन गळ घालून न्हंयेंत बुडिल्ले जीप गाडयेचो सोद लायलो. उपरांत दोरयेचे मजतीन ही गाडी ओडून भायर काडली.
मजगतीं, थळावे आमदार ऍड. कार्लुस फेरेरा हांणी घडणुके सुवातेर भेट दिली. ह्यान फुडें हे सुवातेर अशे अपघात जावचे न्हय म्हणून बंद आशिल्ल्या धोक्याचे दोनूय सुवातांचेर बॅरीकेड्स घालचे, अशी मागणी न्हंय परिवहन खात्याकडेन पत्र धाडून करतले. तशेंच गुगल लोकेशनाचो आधार घेतना वाहन चालकांनी काळजी घेवची, असो तांणी उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
