भांगरभूंय | प्रतिनिधी
पणजी : ज्येश्ठ पत्रकार, संपादक, साहित्यीक सुरेश वाळवे (76, व्हाळशी- दिवचल) आयज दीर्घकाळाच्या दुयेंसान संवसाराक अंतरले. तांचे फाटल्यान घरकान्न, चली, जांवय, नात असो परिवार आसा. पाजवाडो मसंडुभूंयेंत तांच्या पार्थिवाचेर आयज सांजवेळा निमणे संस्कार जातले.
‘राष्ट्रमत’ दिसाळ्यांतल्यान संपादक चंद्रकांत केणी हांच्या हाता सकयल तांणी पत्रकारितेक सुरवात केली. उपरांत ते नवप्रभांत उपसंपादक म्हूण कामाक लागले. कालांतरान त्या दिसाळ्याचे संपादक जाले. साबार नवोदीत लेखकांक, पत्रकारांक तांणी संद दिली. गोंयांतल्या बऱ्याच जेश्ठ पत्रकार, संपादकांनी तांच्या हाता सकयल काम केलां. गोंय, गोंयकारपणा खातीर तांणी आपले पत्रकारिते वरवीं व्हडलें योगदान दिलां. कोंकणी- मराठी आंदोलना वेळार भाशां मदीं निर्माण जाली कोडसाण मिटोवपाक तांणी लेखणे वरवीं बरेच यत्न केल्ले.
पयलो चंद्रकांत केणी स्मृती पत्रकारिता पुरस्कार वाळवे हांकां नोव्हेंबर 2021 त मेळिल्लो. पोरुं दिवचले मानेस्तांचे हाजेरींत तांची पंच्चाहत्तरी मनयिल्ली. तांणी साबार पुस्तकां बरयल्यांत. व्हाळशेंत सभाघर, बसस्टाॅप, वाचपघर, मुळावी शाळा उबारल्या. हालींच पेनाचें चिन्ह आशिल्लें स्मारक तांणी दिवचल बायपास रस्त्यार उबारिल्लें. ताका वाळवे सर्कल अशें नांव दिवचें अशी तांची इत्सा आशिल्ली. तांकां भतग्राम भूषण पुरस्कारुय भेटयिल्लो.
छत्रपती शिवाजी महाराज दिवचल, नार्व्यां आयिल्ले तेन्ना त्या वेळार तांच्या घराण्यांतल्या पुरोहीतान धर्मीक कार्य केल्लें. राज्याभिशेका वेळारुय तांकां आमंत्रण आशिल्लें. ‘वाळवे घराण्याचा इतिहास’ ह्या राजेंद्र केरकार हांच्या पुस्तकांत ताचो उल्लेख आसा.
तांच्या मरणान गोंय पत्रकार मळाचेर दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
