भांगरभूंय | प्रतिनिधी
पणजीः अरबी दर्या आनी बंगालचे खाडींत तयार जावपी मोंथा चक्रवादळाक लागून गोंयांत पावसाचें प्रमाण वाडटलें. कोंकण दर्यादेगां सयत गोंयांत पावस वाडुये अशी शिटकावणी हवामान खात्यान दिल्या. आयतारा दीसभर सगल्याक पावस पडलो. हवामान खात्यान 29 ऑक्टोबर मेरेन येलो अॅलर्ट जारी केला. आयतारा सकाळी 8.30 ते सांजे 5.30 मेरेन पणजेंत 1 इंचा परस (27.2 मिमि) चड पावस पडलो.
दिवाळे सावन सुरू जाल्ल्या बिगरमोसमी पावसाचो नेट सेगीत आशिल्ल्यान ताचें वट्ट प्रमाण 36 टक्के चड आसा. आयतारा सगल्याक पावस पडलो. दीसभर दमट हवामान आशिल्लें. आतां मेरेन गोंयांत 1 ऑक्टोबर उपरांत 2.61 इंच (66.4 मिमि) पावसाची नोंद जाल्या. हें प्रमाण 36 टक्के चड आसा.
फाटल्या 24 वरांत गोंयांत लागीं लागीं 1 इंच (23.3 मिमि) पावसाची नोंद जाल्या. फाटल्या 24 वरांत धारबांदोडें वाठारांत सगल्यांत चड 2.61 इंच (66.4 मिमि) पावसाची नोंद जाल्या. हाचे उपरांत काणकोण (35.4 मिमि), मुरगांव (34.2 मिमि), पणजी (25 मिमि) ह्या वाठारांनी 1 इंचा परस चड पावसाची नोंद जाल्या.
मोसमी पावस सोंपले उपरांत पावसाचो नेट उणो आशिल्लो. मात दिवाळे पयलीं पावसाचें प्रमाण वाडलें. शेनवारा सगल्यांत चड म्हणल्यार 24 वरांत तीन इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
