भांगरभूंय | प्रतिनिधी
वीज खात्यान डिसेबरांतल्यान सांजचे 5 ते सकाळीं 9 मेरेनच्या वीज वापराचेर 20 टक्के मायज पयशे घेवपाचें थारायलां. ही कल्पना डोनाल्ड ट्रम्प हांणी लागू केल्ल्या टॅरिफा वयल्यान बी घडये सुचल्या आसत, पूण ती लोकांक अर्थीक नदरेन त्रासांत घालतली, अशें जाणकारांक दिसता. मुळांत सध्या पयलीं परस लायटीचें बील चड येता. आतां तातूंत ही वाड. सामान्यांच्या बोल्साक आनीक खार पडटलो. खरें म्हणल्यार वीज वापराचेर ‘लगान’ लावचे परस, वीज बचतीक उर्बा दिवपाक जाय. सांजवेळचीं स ते रातचीं बारा हो ‘पीक टायम’. ह्याच काळांत घरांनी आनी भायरुय विजेचो चड वापर जाता. उद्देग, वेवसायिकांचें लायटीचें बील घरगुती वापरा परस चड आसता. हो भेदभाव सोंपोवपाक घरगुती वीज गिरायकांक हें ‘दुगना लगान’ लायतात, अशें कोणे म्हणल्यार वायट दिसपाक नाका.
आदल्या तेंपा कडेन तुळा केल्यार आतां संगणक, मोबायल, एसी, ईव्ही गाडी, ओव्हन, फ्रीज, वाॅशिंग मशीन हांचेर चड वीज खर्च करची पडटा, हें कोणूय सांगतलो. सगल्यांत सवाय वीज दर गोंयांत आसात, असो युक्तीवाद केलो तरी हांगा सगल्यांत चड वीज गिरायकां आनी तांकां बील फारीक करतना सर्कस करची पडटा, हें खात्याक समजूंक जाय. विद्यार्थी रातचे अभ्यास करतात, संगणक, एसी, गिझराचो चड वापर रातचो जाता. 99 टक्के लोक गाडयो रातच्योच चार्ज करतात. फॅर मारप, कपडे उमळपाचें कामूय रातचेंच जाता. कारण दीसभर कोण घरांत आसनात. गोंयांत नायट लायफ, नायट पर्यटन वाडलां. सांजचो बाजार करपाची पद्दत सुरू जाल्या. रातभर पब, हाॅटेलां, शॅक्स वीज वापरतात. स्मार्ट मिटर बसोवपाचें काम चलता. ताचेर कोण केन्ना कितली वीज वापरता, तें कळटलें. महाराष्ट्रांत असले मिटर बसयल्यात, ताचे आड थोड्यांची आरड चालू आसा. ती गोंयांतूय चालू जावं येता. हे मिटर वीज खातें बसयता काय कोण ‘गोंयकार काॅण्ट्रेक्टर’ नेमला? वीज नियंत्रण आयोगान पीक टायमा वेळार वेगळे वीज दर लायतले अशें म्हणिल्लें. येणावळी खातीर हो निर्णय योग्य आसलो तरी म्हारगायेच्या दिसांनी लोकांक ताचे त्रास जातले. वीज पुरवणूय अखंड आसताच, अशें ना. हालींच पर्वरे सारक्या उपनगरांत लायटीचो आपालिपा चलतालो. म्हणटकच चड बील घेतात, जाल्यार तशी उच्च सेवाय दिवंक जाय.
रातच्या वेळार 20 टक्के चड दर लायतले, जाल्यार सकाळीं 9 ते सांजवेळा 5 वरां मेरेन 20 टक्के उणो दर कित्याक लावचो न्हय? सांजच्या, रातच्या वेळार लायटीचो उणो वापर केल्यार ग्रीड, वीज वितरणा वयलो लोड उणो जातलो. पूण तशी गोंयांत वीज वापराच्या बाबतींत अंदाधुंदी जाताच. घरांनी रातची लायट वापरतात, ती गरज म्हूण. चैन करपाक न्हय, हेंय मतींत घेवंक जाय. लायटीचो चड वापर जाता जाल्यार स्ट्रीट लायटी कित्याक वाडल्यात? जंय एलईडी दिवो पेट्टालो थंयच नवो खांबो बसोवन ताचेर चार- चार एलईडी बसयल्यात. स्ट्रीट लायटीचेर नियंत्रण जायच. चड बील घेवचे परस लोकांक विजेची बचत कशी करची तें सांगचें. विजेची बचत करपी बल्ब, उपकरणां सवलतीच्या मोलांत दिवचीं. सौर उर्जेच्यो येवजण्यो चालीक लागल्यात. लोकांनी नांवनोंदणीय केल्या. त्यो बेगीन सुरू जावंक जाय. गोबर गॅस यंत्रणेचोय प्रचार केल्यार बरो. इन्व्हर्टरुय दिवचे..!! जमनी पोंदच्यान वीज केबल व्हरपाचे आशिल्ले ताचें कितें जालें?
स्मार्ट मिटर लायतकच बील कितलें येता तें पयलीं पळोवचें आनी मागीरुच ही 20 टक्के दरवाड करची काय ना, ताचेर विचार करचो. म्हारगायेंत हुलपुपी लोकांक बरे दीस येतले हे खातीर वीज खात्यान यत्न करप बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
