भांगरभूंय | प्रतिनिधी
श्रीपाद नायक : सगले मेळून रवी नायक हांचे विचार व्हरुया फुडें
भांगरभूंय । प्रतिनिधी
फोंडें : समाजांतल्या तळागाळांतल्या लोकांची उदरगत जातली जाल्यार शिक्षण हो एकूच पर्याय आसा. शिक्षणाच्या माध्यमांतल्यान समाज परिवर्तन जावं येता हें रवी नायक हांणी आपले मेहनतीन दाखोवन दिलें. गांवगिऱ्या वाठारांतलीं भुरगीं शिकून व्हड जावचीं म्हूण तांणी फोंड्याक शिक्षणीक हब केलें. तांचे हेच विचार आमी सगले मेळून फुडें व्हरुया, अशें केंद्रीय मंत्री श्रीपाद नायक हांणी सांगलें.
आदले मुख्यमंत्री रवी नायक हांच्या उगडासा खातीर बेतोडेंच्या सनग्रेस गार्डनांत शोकसभेचें आयोजन केल्लें. त्या वेळार मंत्री नायक उलयताले.
राष्ट्र सेवा हीच सर्वोच्च सेवा, हें रवी नायक हांणी आपले कार्यशैलींतल्यान दाखोवन दिलें. राजकारण करतना वैयक्तीक संबंद केन्नाच इबाडपाक दिवंक ना, अशेंय मंत्री नायक हांणी सांगलें.
भाजप प्रदेशाध्यक्ष दामू नायक हांणी सांगलें, कूळ मुंडकार ह्या संबंदांत रवी नायक हांणी तळागाळांत वचून जनजागृती केली, ताका मोल ना. कश्टकरी लोकांक न्याय मेळचो हे खातीर तांणी घराघरांनी वचून लोकांक हे संबंदांत शिक्षीत केले.ज्या काँग्रेस पक्षाक रवी नायक हांणी मानाची सुवात मेळोवन दिली त्या काँग्रेस पक्षाच्या वरिश्ठ फुडाऱ्यांक मात रवी नायक हांकां आर्गां ओंपपाक जालीं ना, हें तांचें दुर्दैव.
उदकास्रोत मंत्री सुभाष शिरोडकार हांणी सांगले, रवी नायक हे बरे हॉलिबॉल खेळगडे आशिल्ले. सहाजीक तांणी खेळाडूवृत्ती सांबाळिल्ली. त्या खेळांतले ते एक बरे श्मॅशर आशिल्ले. निमाणे मेरेन तांणी वायट गजाली स्मॅश करपांतूच जीण सारली. तांची संघर्श करपाची वृत्ती तरणाट्यांक मार्गदर्शक थारतली.
वीज मंत्री सुदिन ढवळीकार हांणी सांगलें, रवी नायक हांचे विचार स्पश्ट आसताले. सगल्यांची उदरगत हो तांच्या विचारांचो केंद्रबिंदी आसतालो. गांवगिर्या वाठारांतल्या भुरग्यांनी आयज उच्च शिक्षण घेवन तांकां खरी आर्गां ओंपचीं. तांणी घेतिल्ल्या कश्टांक लागून आयज गांवगिऱ्या वाठारांतलीं भुरगीं शिकून व्हड जाल्यांत.
आमदार गोविंद गावडे हांणी सांगलें, रवी नायक हांणी सुरवाती सावन दे लोकांच्या हितांचे निर्णय घेतले, ते आयजूय गोंयकारांचें हीत सांबाळटा. फुडले खूबशे शेंकडे तांचे आयचे निर्णय सगल्या गोंयकारांचें हीत सांबाळटले. तांचे वाटचालींत खूब जाणांनी खो घालपाचो यत्न केलो. मात ते कोणाक बदले नात, हेच खातीर आपल्या नांवाची निशाण दवरून गेले.
नरेंद्र सावयकार हांणी सांगलें, लोकांची नस वळखुपी असो हो फुडारी आशिल्लो. अश्यो व्यक्ती चुकून जल्माक येतात. लोकां मदीं रावून लोकांक कितें जाय नाका, तें पळोवपी अशें हें नेतृत्व आशिल्लें.
आमदार विरेश बोरकार, आदले मंत्री प्रकाश वेळीप, महेंद्र रायकार, अॅड. नेल्सन सुवारीस, हरवळे रुद्रेश्वर देवस्थानचे अध्यक्ष यशवंत माडकार, साहित्यीक मिलिंद माडगूत, अखील गोंय मुस्लीम जमात उपाध्यक्ष सलीम काझी, डॉ. मधु घोडकेरीकार, पीईएस महाविद्यालयाचे प्राचार्य डॉ. विकास पिसुर्लेकार, पत्रकार नरेंद्र तारी, यतीश नायक हांणई समर्पक उतरांनी रवी नायक हांकां आर्गां ओंपलीं. कार्यावळीचे सुरवाक सर्व धर्मीय प्रार्थना कली. अक्षता पुराणीक हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
