भांगरभूंय | प्रतिनिधी
ह्यो सगल्यो साबार गजाली आनी ताका बेसबरें दिग्दर्शन आनी पटकथा, सिनेमांक उंचेल्या पावंड्याचेर व्हरून दवरता.
हय, तुमी लेखाचो माथाळो बरोबरच वाचला. हालीच देशभरांतल्या सिनेमाघरांनी धुमाकूळ घालपी “कांतारा द लेजन्ड चॅप्टर- 1” हो सिनेमा एक अभिजात कलाकृती वा “मास्टरपीस” अशेच एक सिनेमा समीक्षक आनी अभ्यासक म्हूण हांव म्हणटलों. एका येसस्वी आनी स्टोरिकल चित्रपटाक ज्या साहित्याची आनी वैशिष्ट्यांची गरज आसता, ते सगले घटक ह्या कलाकृतीत पळोवंक मेळटा.
भारतीय हिंदु धर्मातल्यो दंतकथा आनी पौराणिक कथा – संदर्भ तशेच दैवी पात्रांचो आसपाव (Folklore), हिंसक दृश्यां, साहसदृश्यां, प्रेम आनी मोग (मनशां विशीं आनी देवां विशी, दोनय तरेचो), क्रोध, करूणा, दया, अन्याय आनी दुष्ट प्रवृत्तिन्चो नाश करपाक लागून परमेश्वरी वा अतींद्रिय शक्तीन (supernatural entity) जल्माक घाल्लो एक नायक, राजा महाराजांच्या काळातलें कथानक, कर्नाटक, तुळू या भागांतल्या दुर्गम ग्रामीण लोकसंस्कृतीत जांचे संदर्भ सापडटात आनी जांची आयच्या विज्ञानवादी आनी तथाकथित फुडारिल्ल्या समाजिक वेवस्थेनय पूजा जाता ते पंजुरली, गुलिगादेव, चामुंडी ह्यो देवता, पौराणिक ग्रंथांतले विष्णू आनी महादेव शंकर हांचो संबंध, मदींच हांसोवपी विनोदी पात्रां, रिषभ शेट्टी सारको हिरो (नायक हो शब्द टाळ्ळा, कारण तो कथेचो नायक बेर्मे हे पात्र आसा), गुलशन देवय्या ह्या बॉलिवूडच्या मुखेल प्रवाहातल्या प्रतिभावंत आनी ताकदीच्या नटान साकारिल्लो केली वेसनी आनी रंगेल, दुष्ट राजा ह्यो सगल्यो साबार गजाली आनी ताका बेसबरें दिग्दर्शन आनी पटकथा, सिनेमांक उंचेल्या पावंड्याचेर व्हरून दवरता. गोंयात आमी देवचार, राखणदार, देवाचो अंगात संचार जावप, सैतानी शक्ती आनी ताचे आड ईश्वरी शक्ती हांचो संघर्ष हाचे विशीं बरेंच कितें स्वताच्या दोळ्यांनी अणभव घेतिल्ले लोक आसात. (अतींद्रिय शक्तीचो अणभव घेतिल्ल्या लोकांक हांव स्वता प्रत्यक्ष मेळ्ळां, देखून म्हजो विश्वास आसा, विज्ञानवादी आनी बुद्धीप्रामाण्यवादी (Rational) आसलो तरीय बी) तांका हो सिनेमा खूब आवडुंक शकता.
“कांतारा” ह्या 2022 सालात आयिल्ल्या सिनेमाचो हो दुसरो भाग आसलो तरीय हो प्रिक्वल आसा, म्हटल्यार मूळ कथानकाची पार्श्वभूमी आशिल्लें काय शतकां पयलीं घडिल्ल्यो घडामोडी दाखोवपी कथानक. सिनेमांतलीं साहसदृश्यां, ग्राफिक्स, वेग बऱ्या पैकी उंचेल्या दर्जाचो आनी हॉलिवूड सिनेमाक टक्कर दिवपी आसा. 1970 ते 1990 च्या दसकांत वाडिल्ल्या आमचे पिळगेक “चंदामामा” वा “चांदोबा” ह्या मासिकांतल्यो पोरण्या काळांतल्या काणयांच्यो यादी ताज्यो करपी ह्या सिनेमांत, संवसारात वैकुंठ आनी कैलास ह्या देवलोकांतल्यान पृथ्वीचेर धरतरेचेर पडिल्ले पंजुर्ली (वराह अवताराचो अंश) आनी गुलिगा (शंकराच्या भस्मातल्यान प्रकट जाल्लो देव) ही दैवतां पृथ्वी वयल्या मनशांचें रक्षण वायट प्रवृत्तीं पसून कशे करतात हाचें यथार्थ दर्शन ह्या सिनेमांत घेवपाक तो मुजरत तुमी तुमचे “मस्ट वॉच” वळेरेंत घालात आनी मुजरत पळेयात.
कलाकारांचेर उलयतना गुलशन देवय्या, जयराम, रूक्मिणी वसंथ हांणी आपल्या भुमिकांनी जीव ओतून अभिनय करतना आपल्यो व्यक्तिरेखा ताकदीन उब्यो केल्यात. रिषभ शेट्टी हांणी उबो केल्लें “बेर्मे” हें नायकाचें पात्र एक “लॉर्जर देन लायफ” अशें नायकाचें पात्र आसा, जाचे कडेन अमानवी शक्ती बरोबर एक दैवी वरदानय बी आसता. आता तो मनीस का मनशाच्या रूपांत आयिल्लो देवाचो अंश हें 2026 (निर्मितीपूर्व काम आनी पटकथेचे संशोधन वाडले जाल्यार 2027) सालात येवपी “कांतारां चाप्टर 2” ह्या सिनेमाच्या तिसऱ्या भागांत कळटलें. हो नायक शेट्टी हांणी जे तरेन साकारला, ताका खरेंच तोड ना. खंयच्याय मुखेल प्रवाहांतल्या बॉलिवूड वा दाक्षिणात्य सिनेमा उद्देगांतल्या अभिनेत्याक हें पात्र आनी असो अभिनय जमचो ना, जे काम रीशभ हांणी केला. तांका हॅट्स ऑफ! कन्नड सिनेमा आनी संस्कृती आनी परिणाम म्हूण भारतीय संस्कृती आनी आध्यात्मिकता तांणी कांतारा सिनेमाच्या माध्यमांतल्यान संवसारिक पावंड्याचेर व्हरून दवरला. दरेकल्या सिनेमा मोग्यान हो सिनेमा थिएटरात वचून 70 एम एम स्क्रिनीचेर, व्हड पडद्याचेरच पळोवचो, इतलेंच हांव एक सिनेमा समीक्षक म्हणून न्हय, एक चित्रपट अभ्यासक आनी एक फिल्म मोगी म्हूण सांगुंक शकतां.
– सनतकुमार फडते
70204 38469
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
