भांगरभूंय | प्रतिनिधी
कोमुनिदाद वांगड्यांचे सहमतीनूच लोकांनी घरां बांदलीं
पणजी : कोमुनिदाद समितीच्या कांय वांगड्यांचे सहमतीन लोकांनी कोमुनिदादीचे सुवातेर घरां बांदल्यांत. कोमुनिदादींनी न्यायालयांत वचनासतना घरां अधिकृत करपाक मजत करची. लोकां कडल्यान दंडाच्या स्वरूपांत घेतिल्ली रक्कम सरकार परत कोमुनिदादींकूच दितलें, अशें मुख्यमंत्री डॉ. प्रमोद सावंत हांणी सांगलें.
‘म्हजें घर येवजणे’चे अर्ज वाटपाच्यो कार्यावळी आयज राज्याच्या विंगड विंगड भागांत जाल्यो. ह्या सगल्या कार्यावळींक मुख्यमंत्री डॉ. प्रमोद सावंत मुखेल सोयरे म्हणून हाजीर रावले. सांखळे उपरांत कुंभारजुव्यां मतदारसंघांतल्या पोरणें गोंय जाल्ले कार्यावळींत मुख्यमंत्री उलयताले. ह्या वेळार आमदार राजेश फळदेसाय आनी पोरणें गोंय पंचायतीचे पंच हाजीर आशिल्ले.
दरेकल्या कडेन स्वताच्या हक्काचें घर आसपाक जाय. हे खातीर ‘म्हजें घर येवजणेची’ कारवाय सुरू आसा. हे येवजणे खाला घराचें विभाजन (पार्टीशन) जाले उपरांत अटल आसरो येवजणेचो लावूय घरां नांवार जाल्ल्या सगल्या भावांक मेळटलो. सरकारी, कोमुनिदाद वा खासगी सुवातेवेलें खंयचेच घर मोडचें न्हय, होच हेतू हे येवजणे फाटलो जावन आसा.कांय दिसां उपरांत सगल्या पंचायतींनी अर्ज दिवन, ते भरून घेवपाक शिबिरां आयोजीत करतले. ह्या शिबिरांनी अर्ज भरपा वांगडा कागदपत्रां विशींय गरजेचें मार्गदर्शन करतले, अशें मुख्यमंत्र्यान म्हणलें.
म्हजें घर येवजणेचें उक्तावण केंद्रीय गृहमंत्री अमित शहा हांचे हस्तुकीं जाल्लें. उत्तर आनी दक्षिण गोंयांत मेळून आदीं धा मतदारसंघांनी कार्यावळी जाल्ल्यो. आयज ह्या कार्यावळींक परत सुरवात जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
