भांगरभूंय | प्रतिनिधी
मुख्यमंत्र्यानी मजत करपाची दिली हमी
दिवचल: दिवचल म्हालांतलें अंदूं भात पीक बरे तरेन पिकिल्लें आसतनाच अचकीत आयिल्ल्या पावसाक लागून कापणेक आयिल्लें भाताचें शेत आडवें पडिल्ल्यान आनी तयार भाताक कोंब आयिल्ल्यान शेतकार बरेच चिंतेस्त आसात.
७० ते ८० टक्के भातशेती उदका पोंदा गेल्ल्यान शेतकारांच्या कश्टांचेर उदक शिपडलां. शेतकारांक बेगोबेग अर्थीक मजत दिवपा विशीं कृषी खात्यान शेतीची पळोवणी करून लुकसाण भरपाय दिवची अशी मागणी शेतकार करतात. मायण, नावेलेचें सुमार वीस हॅक्टर भात पीक कापणी खातीर सज्ज आसतनाच अचकीत पावस आयिल्ल्यान उदक व्हडा प्रमाणांत भाताच्या शेतांनी भितर सरलें. ९०% भात आडवें जाल्ल्यान आनी कणसांक कोंब आयिल्ल्यान व्हड लुकसाण सोंसचें पडटलें अशें दिवचल म्हाल शेतकी उत्पादक संघाचे अध्यक्ष विश्वंभर गांवस हांणी सांगलें.
सरकारान बेगोबेग पंचनामो करपाक घेवचें. आनी शेतकारांक गरज आशिल्ली मजत करची असोय उलो शेतकारांनी मारलो.
दिवचल म्हालांतल्या साळ, मेणकुर्यां, लाटंबरसे, नावेले, नार्व्यां, मुळगांव, सुर्ला आनी हेर वाठारांतल्या शेतांनीय पावसाक लागून लुकसाण जालां. कृषी अधिकार्यांनी हे विशीं बेगोबेग येवन पळोवणी करपाची मागणी शेतकार करतात.
मुख्यमंत्र्यानी घेतली दखल
मजगतीं दिवचले तशेंच राज्यांत विवीध सुवातांचेर पावसाक लागून भात-शेतांचें लुकसाण जालां. हे विशीं आपूण कृषी अधिकार्यां वरवीं पळोवणी करून, लुकसाणेचो अहवाल तलाठी वरवीं सादर करपाच्यो सुचणव्यो करतलों, अशें मुख्यमंत्र्यांनी आयतारा सांगलें.
पावसाक लागून जायत्या भागांनी लुकसाण सोंसचें पडटा हे विशीं विचारलें तेन्ना, हाची सरकार निश्चीतूच दखल घेतलें आनी योग्य, गरजेचो मोबदलो दिवपा कडेनूय सरकार लक्ष दितलें अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
