भांगरभूंय | प्रतिनिधी
सांखळे ‘म्हजें घर येवजणे’चे अर्ज वाटपाचे कार्यावळीचें उक्तावण
दिवचल: राज्य सरकारान सुरू केल्ली ‘म्हजें घर येवजण’ ही मालकी हक्कूच न्हय तर समाजीक आनी कुटुंबीक अंतर पयस करून मानसीक भलायकी सुदारतली. साठ वर्सांनी जांकां शक्य जावंक ना तें काम म्हज्या सरकारान दुरदृश्टी दवरून हातांत घेतिल्ल्यान वेगळेच तरेचें समाधान मेळटा. सरकारी जमनींत कसलेच तरेचें अतिक्रमण सहन करचे ना. दरेकल्यान ‘म्हजें घर’ येवजणेचो लाव घेतना गरजेच्यो तरतुदी पुराय करून आपलें घर, स्वताच्या हक्काचें घर म्हणून वेगळें समाधान मेळोवचें अशें मुख्यमंत्री डॉ. प्रमोद सावंत हांणी सांखळे हांगा म्हणलें.
‘म्हजें घर’ येवजणे खाला सांखळे मतदारसंघांतल्या ग्रामस्थ नागरिकांक येवजणेचे विवीध अर्ज वाटले तशेंच तांची छाननी केली. ह्या वेळार सरकारी अधिकार्यांचे हाजेरींत गरजेचें मार्गदर्शन करपाचे कार्यावळीचें हायोजन सांखळेच्या रवींद्र भवनांत केल्लें.
ह्या वेळार माचयेर जिल्लोधिकारी अंकित यादव, उपजिल्लोधिकारी नेहाल तळवणेकार, श्रीपाद माजीक, मामलेदार,भाजप मंडळ अध्यक्ष रामा नायक, जिल्लो पंचायत वांगडी गोपाळ सुर्लीकार, सुलक्षणा सावंत, सरपंच रोहिदास कानसेकार, बाबला मळीक, सरपंच साई गावडे, सपना पार्सेकार, संतोष नायक, सरपंच मामलेदार आनी हेर मानेस्त हाजीर आशिल्ले.
सरकारी जमीन, कोम्युनिदाद जमीन हे विशीं जांचीं घरां आसात तांकांय गरजेची फाटपुरवण केले उपरांत अर्ज भरून आनी गरजेची रक्कम सरकार दरबारांत जमा करून कायदेशीर सनद मेळपाची वेवस्था आसा.
मात मजगतीं, सरकारी जमनीचेर अतिक्रमण करून बेकायदेशीर कृती केल्ल्याचें समजल्यार कारवाय जातली. ह्यान फुडें सगल्यांनी हे विशीं सतर्क रावचें. सरकार कोणाचेंच चुरचुरें करचें ना, अशी शिटकावणी ह्या वेळार मुख्यमंत्र्यान दिली.
येवपी स म्हयन्यांत सगले तरेचीं कागदपत्रां सादर करपाची वेवस्था केल्या. जे लोक ह्या दिल्ल्या वेळार कागदपत्रां सादर करतले तांकां योग्य तरेन सरकारी नियोजना प्रमाण सनद मेळटली. ताचे उपरांत आयिल्ल्या अर्जां विशीं वेगळे तरेचो विचार जातलो, अशें तांणी मुखार म्हणलें.
घरा विशीं वा येवजणे विशीं अदीक तपशीलवार म्हायती घेवप गरजेचें. विवीध गटांनी आपले अर्ज सादर करपाची सुविधा दिल्या. रस्त्या लागसार जीं घरां आसात तींय कायदेशीर करपाची तरतूद तरतूद सरकारान केल्या. एकाच घरांत चार भाव वेगळे रावता जाल्यार तांकांय वीज, उदक, शौचालय आनी हेर सुविधा मेळचे खातीर वेगवेगळे नंबर दिवपाची येवजण ‘म्हजें घर येवजणें’त आसा. हाका लागून घरांतले ताण, वाद उणे जावन मानसीक समाधान मेळपाक ‘म्हजें घर येवजण’ फायद्याची थारतली, असो विस्वास मुख्यमंत्र्यान उक्तायलो.
‘अटल आसरो येवजणे’ खाला घरां कायदेशीर नाशिल्ल्यान येवपी आडमेळींय पयस करपाची येवजण आसा. चार लोक आसल्यार चारूय लोकांक विवीध तरेन ताचो लाव दिवपाचें प्रयोजन आसतलें. घर दुरुस्ती खातीर मुख्याधिकारी सचीवांनी फकत तीन दिसांनी ना हरकत दाखलो दिवप सक्तीचें. हे खातीर नगरसेवक, पंचायत मंडळांक परत परत येवन मेळपाची गरज ना. सरकारी जमिनींतलीं घरां कायदेशीर करतना सगले तरेची खबरदारी ठीतले, अशें मुख्यमंत्र्यान म्हणलें.
खुबशे कडेन घरावेल्यान न्यायालयांत खटले चालू आशिल्ल्यान तांचे निकाल जावन घर मोडपाच्यो ऑर्डरी जायत आसतात आनी हें सगलें सरळ सरकार म्हळ्यारूच मुख्यमंत्र्यांचेर येता. मुख्यमंत्र्याक वायट उतरां घेवचीं पडटात. ह्यान फुडें अशे तरेची कसलीच कागाळ येवची ना आनी येवची न्हय हे खातीर येवपी स म्हयन्यांत सगले तरेची खबरदारी घेवन, अर्ज भरून दरेकल्याक घराचो मालकी हक्क दिवपाचो सरकाराचो इतिहासीक निर्णय आशिल्ल्याचें मुख्यमंत्री डॉक्टर प्रमोद सावंत हांणी ह्या वेळार सांगलें.
ह्या वेळार मुख्यमंत्र्यां हस्तुकीं कांय ग्रामस्थांक अर्ज वाटले. उपजिल्लोधिकारी नेहाल तळवणेकार हांणी सगल्यांक येवकार दितना येवजणे विशीं सविस्तर माहिती दिली. हे येवजणेचो लाव घेवपा खातीर शेकड्यांनी ग्रामस्थ हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
