भारतांतली पयली अभिनेत्री ‘गोंयकार’

भांगरभूंय | प्रतिनिधी

याद शेणिल्ली

भारतीय सिनेमा उद्देग हो संवसारांत सगल्यांत व्हडलो. हिंदी सिनेमासृश्ट ही भारतीय सिनेमा मळाचेर आघाडेचेर आसा. मात हालींच्या वर्सांनी तेलगू, तामिळ सिनेमा सृश्टींनी तिका फाटी उडयल्या. पयलो सिनेमा दादासाहेब फाळके हांणी काडिल्लो. भारतीय सिनेमासृश्टींतल्यो कांय शेणिल्ल्यो यादी परत ताज्यो करुंया.

0 पयलो सिनेमा दादासाहेब फाळकेन काडलो. पयल्या सिनेमांत काम करपाक बायलो मेळना जाल्यो. शिंदळकी करप्यांनी पसून काम करपाक न्हयकार दिलो. फाळके हांच्या 1913 त मोहिनी भस्मासूर ह्या दुसऱ्या सिनेमांत मात दोन बायलांनी काम केलें. भारतीय सिनेमांत काम करपी त्यो पयलो बायल्यो. दुर्गाबाई कामत आनी तांची सान चली कमलाबाई हांणी त्या सिनेमांत काम केलें. पार्वतीची भुमिका केल्ली दुर्गाबाईन. तिचो जल्म अस्नोड्यां (बार्देस) 1879 वर्सा जाल्लो. चंद्रकांत गोखले हे नामनेचे नट तांचे नातू (चलयेचो पूत). पणटू विक्रम गोखले हेय फामाद नट.

0 पयली बायल दिग्दर्शक, निर्माती आनी पटकथा लेखक फातमा बेगम. तिणें फातमा फिल्म्स हे आपले कंपनी वरवीं 1926 त बुलबुल ए परिस्तान हो सिनेमा काडलो. 1931 तल्या पयल्या भारतीय बोलपटांतली ‘आलम आरा’तली अभिनेत्री झुबेदा ही तिची चली. अभिनेत्री रिया पिल्ले ही तिची पणटी. नात दुर्रेशहावर धनराजगीर हिची चली. फातमा बेगमाच्या सुलताना, शहजादी आनी झुबेदा ह्या तिगूय चलयांनी मूकपट आनी बोलपटांत काम केलां.

0 बाॅम्बे टाॅकिजाची धनी देविका रानी (चौधरी) हिका भारतीय सिनेमाची फर्स्ट लेडी मानतात. 1930, 40 च्या दशकांतली ती अभिनेत्री, निर्माती. पयलो दादासाहेब फाळके पुरस्कार तिका मेळ्ळा. तिचे आवय- बापूय दोगूय जमीनदार घराण्यांतलें. दोगांय गुरुदेव रवींद्रनाथ टागोर हांचीं सोयरीं. दिलीपकुमार, अशोककुमार, मधुबाला हांकां देविका रानी हांणी सिनेमांत पयली संद दिली. अछुत कन्या, जीवन नैय्या, कर्मा हे तिचे काय सिनेमा.