भांगरभूंय | प्रतिनिधी
रोहित शर्माचो शेंकडो आनी विराट कोहलीच्या अर्द शेंकड्या नेटार भारतान येजमान ऑस्ट्रेलिया पंगडाक 9 विकेटींनी हारोवन वन डे माळ 1-2 अशी सोंपयली. हर्षित राणान भेदक मारो करीत ऑस्ट्रेलियेचो डाव 236 धांवड्यांचेर आडायिल्लो, ते उपरांत रोहित शर्मा आनी शुभमन गिल हे जोडयेन भारताक बरी सुरवात करून दिली.
रोहितान आपल्यो पयल्यो 16 धांवड्यो चार चवके मारून काडल्यो, जाल्यार गिलान सावकाश बॅटींग करीत आपलो जम बसयलो. दोगांयनी अर्द शेंकड्याची भागिदारी पूर्ण केली, पूण जोश हेझलवुडान गिलाक बाद केलो. हे माळेंत अजून मेरेन खातें उगडूंक नाशिल्लो विराट कोहली बॅटिंगेक आयलो. ताणें येना फुडेंच पयल्या बॉलाचेर एकोडी धांवडी घेत आपलें खातें उगडलें.
दुसरे वटेन रोहितान खेळपट्टीचेर आपलो जम बसयिल्लो. ताणें कोहली वांगडा मेळून भारताक आनीक बरे स्थितींत हाडलो. कोहली आड एक एलबीडब्ल्यू अपील जाली. अंपायरान नाबाद दिलो. ऑस्ट्रेलिया पंगडान रिव्ह्यू घेतलो. तो ‘अंपायर्स कॉला’क लागून वाटावलो. हाचे खेरीत कोहलीक बॅटींग करतना विशेश आडखळ जाली ना. रोहितान उपरांत कोहलीन लेगीत आपलो अर्द शेंकडो नोंदयलो आनी रोखडीच ह्या बॅट्समनांनी शेंकड्याची भागिदारी पूर्ण केली. विशेश म्हणल्यार, पांच वर्सां उपरांत हांचे मदीं शेंकड्याची भागिदारी जाली. हाचे आदीं, म्हणल्यार जानेवारी 2020त ऑस्ट्रेलिये आड बंगळुरूंत शेंकड्याची भागिदारी केल्ली.
रोहित आनी कोहलीच्या नांवाचेर अजून मेरेन वन डे क्रिकेटींत 19 शेंकड्यांच्यो भागिदाऱ्यो जाल्यात. मजगतीं, कोहली 54 धांवड्यांचेर पावना फुडें, तो वन डे क्रिकेटींत सगल्यातं चड धांवड्यो करपी संवसारांतलो दुसरो बॅट्समन थारलो. ताणें श्रीलंकेच्या कुमार संगकाराक फाटीं घालो.
ते उपरांत रोहितान आपलो 33वो वन डे शेंकडो पूर्ण केलो. शेंकडो पूर्ण जाल्या उपरांत रोहितान आक्रमक बॅटिंगेचो वेग वाडयलो आनी भारतान 39वे मॅचींत भारतान जैत जोडलें. रोहित आनी कोहली हांणी दुसरे विकेटी खातीर नाबाद 168 धांवड्यांची भागिदारी केली.
हे मॅची पयलीं भारता मुखार ‘क्लीन स्वीप’ टाळपाचें आव्हान आशिल्लें. ऑस्ट्रेलिया पंगडान पयलीं बॅटींग करपाचो निर्णय घेतलो. सुरवातीक ताणें भारताक बॅकफुटाचेर धुकल्लो. भारतान वन डेंत सेगीत 18वे खेपे टॉस व्हगडायलो. मिचेल मार्श आनी ट्रॅव्हिस हेडा हांणी आक्रमक सुरवात केली. पूण, मोहम्मद सिराजान हेडाक तंबूंत धाडलो. ते उपरांत अक्षर पटेलान रोखडोच मार्शाक बाद केलो आनी ऑस्ट्रेलियेची सुरवात इबाडली.
ते उपरांत मॅथ्यू शॉर्ट आनी मॅट रेनशॉ हांचे मदीं भागिदारी जाली, पूण वॉशिंग्टन सुंदरान शॉर्ट हाका बाद करून भारताक म्हत्त्वाचो ब्रेकथ्रू मिळोवन दिलो. अॅलेक्स कॅरीची कॅच धरपाच्या यत्नांत श्रेयस अय्यर जखमी जालो, ताका लागून ताका मैदान सोडचें पडलें.
तरी लेगीत ऑस्ट्रेलियाच्यो अडचणी कमी जावंक ना. ताच्यो थारावीक अंतरान विकेटी पडत गेल्यो. वॉशिंग्टन सुंदरान अर्द शेंकडो मारपी रेनशॉक एलबीडब्ल्यू बाद केलो आनी ते उपरांत ऑस्ट्रेलिये खातीर संपूर्ण 50 ओव्हरी खेळप कठीण जालें. राणान कूपर कॉनली आनी मिचेल ओवेन हांकां बाद करून ऑस्ट्रेलियेचेर चेपण वाडयलें आनी उपरांत ताणेंच हेझलवुडाक बाद करून आपलो चवथी विकेट घेतली आनी ऑस्ट्रेलियेचो डाव सोंपयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
