भांगरभूंय | प्रतिनिधी
अॅपलांतल्या जरी भायर सरलो तरीय ताचो धडपडी सभाव ताका वगी बसपाक दिवपाचो नाशिल्लो. ताणें खासा विज्ञानिकां खातीर संगणक करपाचो प्रकल्प हातांत घेतलो. ताचे कडेन आशिल्ल्या अॅपलाच्या 65 लाख शेअरांतले फकत एक शेअर दवरून बाकीचे विकले आनी जे 10 कोटी डॉलर्स मेळ्ळे ते गुंतोवन नेक्स्ट (NeXT) नांवाची कंपनी काडली. अॅपलांत आपल्या वांगडा काम करपी स जाण वांगड्यांक ताणें आपल्या नव्या कंपनींत येवपाचो प्रस्ताव दिलो. स्टिवा वांगडा कितें तरी नवें करपाक मेळटलें ह्या उमेदीन सवूय जाणांनी तो मान्य केलो. संगणक करपाचें काम रात दीस पळयनासतना नेटान सुरू जालें. परत बारीक-सारीक गजाली कलात्मक आनी बऱ्या प्रतीच्यो जावच्यो ह्याच यत्नांत स्टीव लागलो. ते खातीर भरमसाठ वाडपी खर्चाची पर्वा स्टीव करनाशिल्लो म्हूण कंपनी रोखडीच दिवाळ्यांत येवपाची लक्षणां दिसूंक लागलीं. तेच वेळार रोस पॅरॉट नांवाच्या एका अब्जाधिशान तांच्या कंपनींत दोन कोटी डॉलर्सांची गुंतवणूक केली. हार्डवेअर आनी सोफ्टवेअर दोनूय सामाविल्ली एक परिपूर्ण संगणक प्रणाली तयार करपाची ताची मोख आशिल्ली. ते खातीर ताणें मायक्रोसॉफ्ट कंपनीचो संस्थापक बिल गेटसाक सॉफ्टवेअर तयार करपाचो प्रस्ताव दिलो, जो बिल गेट्सान आनी वयल्यान पत्रकारां लागीं स्टीवा बद्दल आनी ताच्या नेक्स्ट कंपनी बद्दल उलट-सुलट उद्गार काडले. तो वेळच असो आशिल्लो की स्टिवाचें नशीब ताका साथ दिनाशिल्लें. तरीय ताणें धीर सोडलो ना. जनमानसांत आपल्या कंपनीची प्रतिमा निवळावपा खातीर 12 ऑक्टोबर 1988 त सां फ्रांसिस्कोच्या सींफनी सभाघरांत एक व्हडलो सुवाळो करून तांणे आपल्या नेक्स्ट संगणकाची वळख लोकांक करून दिली. तो संगणक सर्वोत्कृश्ट कसो हें लोकां मुखार मांडून लोकांच्यो अपेक्षा ताणें वाडोवन दवरल्यो, पूण जेन्ना तो बाजारांत विक्रेक आयलो तेन्ना ताचो साडे स हजार डॉलर्स हो प्रेस पळोवन लोकांनी तो तितलो पसंत केलो ना. धा हजार संगणक दर म्हयन्याक विकपाचें ध्येय स्टीवान दवरिल्लें, पूण प्रत्यक्षांत दरेक म्हय़न्यांत फकत चारशें संगणकाची विक्री जाली.
पिक्सार अॅनिमेशन कंपनीची मालकी :
ताका कलेची आवड आशिल्ल्यान ताणें जॉर्ज लुकास हांचो पिक्सार हो संगणक अॅनिमेशन फिल्म स्टुडिओ एक कोटी डॉलर्सांत विकतो घेतलो आनी एनिमेशन विभागाचो मुखेली जॉन लासेटर हांच्या वांगडा अॅनिमेशन फिल्मां तयार केलीं. तातुंतले लुक्सो जुनिअर, टिन टॉय आनी टॉय स्टोरी अशे जायते पुरस्कार विजेते एनिमेशन सिनेमा तांणी संगणक वापरून तयार केले.
1986 त ताची आवय क्लॅरा फुफुसांच्या कांक्रान दुयेंत पडली संवसार सोडून गेली. ऑक्टोबर 1989त स्टॅनफॉर्ड विश्वविद्यालयांत, वेवसाय वेवस्थापन शाखेच्या पदवीधर भुरग्यां सामकार भाशण दिवपाचें आपोवणें ताका आयलें. थंय ताची वळख लॉरेन पॉवेल हिचे कडेन जाली आनी तांच्या वळखीचे रुपांतर मोगांत जावन 18 मार्च 1991 त तीं दोगांय लग्न जालीं. लग्ना उपरांत तीं पालो आल्टो हांगासर रावपाक लागलीं. ताका एक चलो रीड आनी दोन चलयो – एरीन आनी इव अशीं तीन भुरगीं जालीं. ताचे पयले चली लिसाय तांचे वांगडा रावपाक आयलें. अशे तरेन घराब्याचें सुखय तो अणभवपाक लागलो.
अॅपल कंपनींत पुनर्प्रवेश
ते वटेन 1995 त मायक्रोसॉफ्टान ‘विंडोस 95’ हें क्रांतीकारी सॉफ्टवेअर काडून सगलें मार्केट काबीज केलें आनी अॅपलाची घसरण सुरू जाली. जॉन स्कलीय कंपनी सोडून गेल्लो. आपणें तयार केल्ल्या कंपनीची अशी दुर्दशा जाता तें स्टीवाच्यान पळोवंक नजो जालें. अॅपल कंपनीक एक उत्कृश्ट ऑपरेटिंग सिस्टमाची गरज आशिल्ली जी नेक्स्ट कंपनी कडेन ‘नेक्स्ट स्टेप’ ही आशिल्ली. 1996 त स्टीवान एपल कंपनी कडेन आपलो प्रस्ताव मांडून, 20 डिसेंबराक अॅपल आनी नेक्स्ट कंपनीन करार केलो. स्टिवान अॅपलाचो सल्लागार म्हूण काम सांबाळपाचें मान्य जालें. सुत्रां हातांत घेतकच ताणे वेवस्थापन मंडळा वयल्यान जायत्या जाणांक काडून आपल्याक जाय तश्या व्यक्तींची नेमणूक केली.
आपणें स्थापन केल्ल्या कंपनीक परत जाग्यार हाडपाक आपल्याक संद मेळ्ळी हाची ताका मनासावन धादोसकाय जाली. ल्हव-ल्हव करून कंपनी परत रुळार येवपाक लागली आनी अॅपल कंपनी दिवाळखोरींतल्यान भायर सरली.
फुडें तांणी आय-मॅक संगणक तयार केलो. आनीक एक क्रांतीकारी पावल तांणी घालें ते संगींत क्षेत्रांत. संगीता खातीर आय-पॉड तयार करून संगीत कंपनी कडली. गीतां वितरण करपाक आय-ट्युन्स काडले. आय-पॉडाचेर आपल्याक जाय ते संगीत, अॅपल उपभोक्त्यांक नाममात्र मोलाक आय-ट्युन्स विकत घेवन तें आयकुपाक मेळ्ळें. संगीत क्षेत्रांतली पारंपारिक पद्दत कुशीक उडयत, संगीत नव्या तरेन भौसा मेरेन पावपाची ही एक नवी क्रांती आशिल्ली.
2001 वर्सा वॉशिंगटन डीसी शाराच्या भायर अॅपलाचें किरकोळ दरांत म्हाल विकपी पयलें दुकान उगडलें जंय अॅपलाचीं सगलीं उत्पादना उपलब्ध आशिल्लीं. धा वर्सां भितर जगभरांत मेळून तांणी तिनशें वयर दुकानां उगडलीं.
2003त अॅपल कंपनी जेन्ना आय-फोन निर्मीतीक लागली, तेन्ना दोतोरांनी स्टीवाक स्वादु-पिंडाचो कांक्र आसा म्हूण निदान केलें.
2005 वर्सा ताका स्टॅनफोर्ड विश्व-विद्यालयांत पदवीधरांक भाशण दिवपाक आपयले. तेन्ना ताणें आपल्याच जिणेंतल्यो तीन गजाली सांगल्यो – एक म्हणल्यार आपणें कॉलेज अर्दवट सोडून आपल्याक काळजांतल्यान जे करीन दिसता तें करपा फाटल्यान लागलों. मनशान स्वताच्या मनाचो उलो आयकल्यारच तो स्वताचें सपन पुराय करूंक शकता. दुसरी गजाल म्हणल्यार जेन्ना ताका ताच्या कंपनींतल्यान भायर मारिल्लो तो प्रसंग. तेदे वेळार तो निर्शेवन वचूंक ना, तर नेटान नेक्स्ट आनी पिक्सार कंपनी उबारपाच्या कामाक लागलो. आनी निमणी गजाल मरणाची. आपूण एक दीस मरतलों हाची सदांच याद दवरप. म्हणटकच आमी जिवितांत कितें तरी हारतलीं ह्या विचारांच्या सापळ्यातल्यान आमकां मुक्ती मेळटा. आमचे कडेन वेळ खूब कमी आसता तेन्ना दुसऱ्याची जीण जगपाचें सोडून स्वताच्या सपनां फाटल्यान लागात. हें सगळे ताणें आपले जिणेंत प्रत्यक्षांत हाडलें. तो सदांच सगळ्याच बाबतींत स्वताच्याच मना प्रमाणे जियेलो.
27 जानेर 2010 क अॅपलान आय-पॅड बाजारांत हाडलो जाचें उक्तावण स्टिव जॉब्सान स्वताच्या भपकेबाज पद्दतीन केलें. अॅपलाच्या सगळ्याच उत्पादनांनी क्रांती केली आनी अजुनय तांची नामना जनमानसात आसा.
5 ऑक्टोबर 2011 हे दिसा पिरायेच्या 56 व्या वर्सा एक धडपडी आनी मनमानी जीण जगून तो हो संवसार सोडून गेलो. ताच्या मरणा उपरांत संवसार भरच्या अॅपल स्टोअरांत एय-पॅडाचेर पेटत्या मेणवातीचो फोटो घालून लोकांनी ताका श्रध्दांजली दिली. तांच्याच ऑफिसांतल्या एका कर्मचाऱ्यान अॅपलाच्या लोगोचेर स्टीवाचो फोटो घालून तें इंटरनेटाचेर वायरल केलें. कंपनींतल्या कर्मचाऱ्यांनी, तो जे पद्दतीन आपलें नांव पुराय धाकल्या वर्णमाळेंत बरयतालो तेच पद्दतीन ‘अॅपल चान्सरी’ फोन्टान एका कागदाच्या कुडक्याचेर कोरलें “iThank you steven paul jobs!”
सोंपता…
मंजुषा सिनाय तळावलीकार
9822981508
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
