भांगरभूंय | प्रतिनिधी
पर्यटक आसून फायदेशीर वेवसाय नाः टीटीएजी
हॉटेलां 70 ते 80 टक्के तांकीन फुल्ल
बशींच्यो, विमानांची सुमारा भायर तिकेट दरवाड
भांगरभूंय । प्रतिनिधी
पणजी : दिवाळीच्या सणा निमतान गोंय पुराय सप्तकभर पर्यटकांनी भरलां. दर्यादेग तशेंच शार वाठारांनी पर्यटकांची गर्दी पळोवपाक मेळटा. पूण पर्यटक फुल्ल आसून लेगीत पर्यटन भागधारकांच्या वांट्याक निरशेवणी आयल्या.
दिवाळीचे सुटयेचो पुराय देशभरांतल्या पर्यटकांनी लाव घेतलो. फाटल्या दोन सप्तकांत पर्यटकांचें गोंयांत येवप- वचप चालू आसा. दिवाळीच्या निमतान दिर्घकाळ सुटी आशिल्ल्यान खूबश्या पर्यटकांनी गोंया येवप पसंत केलां. पयलीं फक्त सप्तकाच्या निमाणे कडेन गर्दी जाताली. हे खेपे दोन सप्तकभर पर्यटकांची गर्दी पळोवपाक मेळ्ळी.
हे मजगतीं, गोंयांत आडवेळ्या पावसान धुमशेण घातलें. पूण ह्या पावसाचो गोंयच्या पर्यटनाचेर कसलोच परिणाम जावंक ना. गोंयच्यो दर्यादेगो चड करून कळंगूट आनी कांदोळे पर्यटकांची सुमारा भायर गर्दी आशिल्ली. तशेंच पणजेच्या रस्त्यांचेर पर्यटकांचे येरादारीक लागून गाडयांच्यो रांको लागिल्लो.
गोंय पर्यटकांनी भरिल्ले खरें, पूण ह्या सप्तकांत फावो तितलो वेवसाय जावंक ना, अशी निरशेवणी टीटीएजीचे अध्यक्ष जॅक सुखिजा हांणी उक्तायल्या.
हे खेपे पर्यटन वेवसाय बरो आसलो, पूण पोरूंचे तुळेंत अंदूं तितलो फायदो जावंक ना. फाटल्या कांय दिसांनी पर्यटकांचे संख्येक उच्चांक आयला. हॉटेलां 70 ते 80 टक्के तांकीन भरल्यात. गोंयांत येवपी सगळीं विमानां पर्यटकांनी फुल्ल जावन गोंयांत देंवल्यात, अशी म्हायती सुखिजा हांणी दिली.
मजगतीं, दिवाळीचे फाटभुंयेर बशी आनी विमानाच्यो तिकेटींचे दर तेंगशेर पाविल्ले. मुंबय-बंगळूर सावन येवपी बशींच्यो तिकेटी ज्यो सादारण 1 हजार मेरेन आसल्यो त्यो वाडून चार- पांच हजार रुपया मेरेन पावल्यात. तशेंच विमानाचे दोन- तीन हजारांचे तिकेटीचे दर बरेच वाडून 10 ते 15 हजारां मेरेन पावल्यात. देखून खूबश्या पर्यटकांनी आपली मोटार घेवन गोंयांत येवप पसंत केलां आनी रस्त्यार गाडयांची कोंयडी जाता. हे विशीं उलयतना सुखिजा हांणी सांगलें, हे दरवाडीचेर नियंत्रण दवरप गरजेचें जालां. कितले मेरेन दर वाडोवं येता हे खातीर एक मर्यादा निश्चीत करपाक जाय. गाडयेन येवप कांय ना हो दर एकल्याचो निर्णय आसा. आमी पर्यटकांक स्वताची गाडी घेवन येवपा पासून आडावपाक शकनात. पूण हे खातीर मुळाव्यो सुविधा देखीक, पार्कींग आसप गरेजेचें, अशें सुखिजा हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
