भांगरभूंय | प्रतिनिधी
भांगरभूंय । प्रतिनिधी
पणजीः भलायकी सेवा संचालनालयान 59 रितीं पदां भरपा खातीर अर्ज मागयल्यात. पूण ही पदां फकत एका वर्साचें कालावधी खातीर भरतलें. पदां खातीर अर्ज करपाची निमणी तारीख 7 नोव्हेंबर आसा अशी कळोवणी भलायकी संचालनालयान काडल्या.
भलायकी मंत्री आनी भलायकी सचिव जे राष्ट्रीय भलायकी अभियानाचे अभियान संचालक आसात हांचे मान्यताये उपरांत राष्ट्रीय भलायकी अभियान, राज्य कुटूंब कल्याण ब्युरो, भलायकी सेवा संचालनालय खाला वट्ट 59 पदां भरपाचें आसात. तातूंतली 10 ओबीसी, 2 एसटी आनी 2 इड्ब्ल्यूएस खातीर राखीव आसात.
हातूंत मडगांव होस्पिसियो हॉस्पिटल आनी मुळावे भलायकी केंद्र कुठ्ठाळे वैजकी अधिकारी ह्या दोन पदांचो आस्पाव आसा. ह्या पदां खातीर म्हयन्याळो पगार 65,000 आसा. समुदाय भलायकी केंद्र तुयें, मुळावे भलयाकी केंद्र बाळ्ळी आनी नावेली 3 पदां भरतले. तातूंतले 1 पद ओबीसी खातीर राखीव आसा आनी ह्या पदां खातीर 42,000 म्हयन्याळो पगार आसा.
होस्पिसियो हॉस्पिटल मडगांवा ऑडियोलोजिस्ट आनी स्पीच थेरापीस्टाचे एक पद भरतले. ह्या पदां खातीर 20 हजार म्हयन्याळो पगार आसतलो. उत्तर गोंय जिल्होधिकारी कार्यालयांत जनसांख्यीक तज्ञ खातीर एक पद रिते आसा. ह्या पदां खातीर 15 हजार म्हयन्याळो पगार आसा. साळगांव भलायकी केंद्रात बायल भलायकी तपासनीस 2 पदां आसात आनी हे खातीर 16 हजार म्हयन्याळो पगार आसा.
जाल्यार म्हापशें आनी मडगांव जिल्लो हॉस्पिटलांत आनी गोंय वैजकी महाविद्यालयांत स्तनपान समपुदेशकाची दरेकीं 3 पदां आसात. तातूंतले एक ओबीसी खातीर आरक्षित आसा. हे खातीर म्हयन्याळो पगार 15 हजार आसा. उत्तर गोंय जिल्लो हॉस्पिटलात तंत्रीक पर्यवेक्षकाचे एक पद आसा. हे खातीर म्हयन्याळो पगार 14 हजार आसा.
नावेली आनी साखळी भलायकी केंद्रात आयईसी पर्यवेक्षकाची दोन पदां, मडगांव आनी म्हापशें जिल्हो हॉस्पिटलांत दांत तंत्रज्ञाची 2 पदां, मडगांव आनी म्हापशें जिल्हो हॉस्पिटलांत तशेंच हळदण आनी कु़डटरी भलायकी केंद्रात प्रयोग शाळा तंत्रज्ञाची 3 पदां आसात आनी तांतूतले 1 पद ओबीसी खातीर आरक्षीत आसा. आयुश दक्षण गोंय हॉस्पिटलांत पंचकर्मा थॅरपिस्ट 1 पद, कंम्प्युटर सहाय्यक एक पद, रेडीयोग्राफर तशेंच एक्सरे तंत्रज्ञ 1 पद आसा. ह्या सगळ्या पदां खातीर म्हयन्याळो पगार 11 हजार आसा.
एमटीएस तशेंच ड्रायव्हर म्हयन्याळो पगारा सयत एक पद, शिरोडें भलायकी केंद्रात 8 हजार म्हयन्याळे पगारा सयत अर्द वेळ दांत सहाय्यक एक पद, चिंबल भलायकी केंद्रात 6 हजार म्हयन्याळो पगारा सयत एक पद रिते आसा.
ह्या पदां खातीर उमेदवारांनी https://forms.gle/HsdcCmTF2krmZwYD6 हाचेर ऑनलायन 7 नोव्हेंबर मेरेन अर्ज करचो.
मजगतीं 33 पदां ही थेट मुलाखत घेवन भरतले. हातूंत सोनोलीस्ट आनी अॅनेस्थेटीस्ट दरेकीं एक जाल्यार रेडीयोलोजीस्ट आनी पेडियाट्रीस्ट दरेकीं दोन पदांचो आस्पाव आसा. ह्या पदां खातीर म्हयनाळो पगार 85 हजार आसतलो. जाल्यार स्टाफ नर्स खातीर 8 पदां आसात तातूंतली एक एसटी खातीर, 2 ओबीसी आनी एक इड्ब्लूएस खातीर आरक्षित आसा. ह्या पदां खातीर म्हयन्याचो पगार 15 हजार आसा. फार्मासीस्टची 6 पदां आसात तातूंतली 1 एसटी, 2 ओबीसी आनी 1 इड्ब्लूएस खातीर आरक्षित आसा. जाल्यार सल्लागाराची 13 पदां आसात तातूंतली 2 एसटी, 4 ओबीसी आनी 1 इड्ब्लूएस खातीर आरक्षीत आसा. ह्या सगळ्याचो म्हयनाळो पगार 11 हजार इतलो आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
