भांगरभूंय | प्रतिनिधी
पणजीः सांजेच्या 5 ते सकाळीं 9 वरां मजगतीं वीज वापराचेर 20 टक्के अधिभार (चड पयशे) घेवपाचो राज्य सरकाराचो निर्णय जनविरोधी आसा. हाका लागून लोकांचेर अर्थीक भार वाडटलो. ही अतिरिक्त दरवाड रोखडीच फाटीं घेतली ना जाल्यार रस्त्यार देंवून आंदोलन करतले अशी शिटकावणी आप गोंयचे प्रदेशाध्यक्ष अमित पालेकार हांणी दिल्या. शेनवारा पणजेंत जाल्ले पत्रकार परिशदेंत ते उलयताले. ह्या वेळार वाल्मीकी नायक आनी सिद्धेश भगत हाजीर आशिल्ले.
भाजपा सरकार लोकांक लुट्टात. डिजिटल मीटर बसयले उपरांत सांजेच्या 5 ते 9 वरां मजगतीं वीज वापरा खातीर 20 टक्के अतिरिक्त दर भरचो पडटलो. अशें करून सरकारान आतां लोकांच्या बोल्सांत हात घाला. ह्या वेळार लोकांनी घरांतल्यो लायटी बंद करुन दिवे पेटोवचे कितें हाची जाप सरकारान दिवची. ह्या निर्णयाचो इलेक्ट्रीक वाहन वापरप्यांचेरूय गंभीर परिणाम जातलो. कारण चडशे लोक रातच्या वेळार गाडी चार्ज करतात. रातचो एसी, गिझर, फॅन चालू आसता, अशें पालेकार हांणी सांगलें.
एके वटेन गोंयच्या लोकांक लुट्टात जाल्यार दुसरे वटेन मंत्री करदात्याच्या पयशांचेर सगळ्या सूख सोयींचो आनंद घेतात अशें सिद्धेश भगत हांणी सांगलें.
भाजपा सरकार आनी तांचे मंत्री खरें नरकासूर आसात. लोकांनी आपल्यो ईव्ही सुदीन ढवळीकार हांच्या घरां व्हरून थंय चार्ज करच्यो. वीज सावन रोजगारा मेरेन सगळ्या पांवड्यार ह्या सरकाराक अपेस आयलां आनी आतां लोकांक अकार्यक्षमतायेची ख्यास्त दिवपाची सरकाराची इत्सा आसा, अशें तांणी सांगलें.
सामान्य नागरिकांचें शोशण
भाजपाचें धोरण उद्देजकांक फायदो जावपा खातीर आनी सामान्य नागरिकांचे शोशण करपा खातीर तयार केल्लें आसा. भाजपा सरकार दरेक मुळावी सेवा वीज, उदक, इंधन आदी लोकांक लुटपाचें साधन म्हणून वापरता अशें वाल्मीकी नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
