भांगरभूंय | प्रतिनिधी
पणजीः अरबी दर्यांत तयार जाल्ल्या उण्या दाबाचो पट्टो तशेंच हेर वातावरणाच्या बदलाक लागून शेनवारा गोंयांत साकळींच पावसान नेटान हजेरी लायली. वेगवेगळ्या वाठारांत झाडां पडून लुकसाण जालें. आल्तिनो रस्त्याचेर चर्च व्ह्यू इमारती मुखार पालसणां कोसळून थंयच्या घरांचें किरकोळ लुकसाण जालें. रातीं अडेजांक सुमार ही घडणूक घडली. नेटाच्या वाऱ्याक लागून श्यामाप्रसाद मुखर्जी स्टेडियम वाठारांत उबारिल्ले डेकोरेशन कोसळून पडलें.
शेनवारा सकाळींच पावस पडपाक सुरू जालो. सकाळीं 10 मेरेन पणजेंत सेगीत पावस पडटालो. ह्या पावसाक लागून शारांतले कांय रस्ते उदका पोंदा गेलें. हवामान खात्यान 25 ते 28 ऑक्टोबर मेरेन गोंयांत वादळी वारें सयत पावस पडपाचो अदमास दिलां. ते प्रमाण ह्या चार दिसां खातीर येलो अलर्ट जारी केला. जाल्यार 29 ते 31 ऑक्टोबर ह्या काळांत मध्यम पावस पडपाची शक्यताय आसा.
गोंयांत सकाळीं साडे आठ वरां मेरेन सरासरी 3 इंच पावसाची नोंद जाली. ही ऑक्टोबर म्हयन्यांतली सगळ्यांत चड पावसाची नोंद थारली. ह्या काळांत काणकोणां 5.60 इंच, मुरगांव 4.12 इंच पावल पडलो. गोंयांत 1 ते 25 ऑक्टोबर मेरेन सरासरी 7.30 इंच पावसाची नोंद जाली.
25 ते 28 ऑक्टोबर ह्या काळांत वाऱ्याचो वेग वराक 35 ते 55 किमी पावपाची शक्यताय आशिल्ल्यान नुस्तेंमार्यांनी दर्यांत देवचें न्हय असो उलो हवामान खात्यान मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
